Bir orynda baıyz taýyp otyra almaıtyn myna aspannyń bultyn aıtam da, osy jyly ádettegideı emes. Kóz jasy taýsylǵandaı. Qarashyǵy tolsa da jylamaıdy. «О́zim shóldegem joq, júregim shóldedi». Jaryqtyq Esenǵalı Raýshanov kórse osylaı deýshi edi-aý. Biraq... Qara jerde qyńq etpeıdi ǵoı tegi, qara sýyqqa eti úırengendeı. Burynǵydaı emes adamdar da bir-birine salqyn. Ýaqyt asyqtyrǵanymen búgin-erteń kóktem kelmeıtin shyǵar. Múmkin keler, kelse de aqynnyń muńly óleńi bolyp qana. О́ıtkeni bul kóktemniń qaıǵysy aýyr. Odan da biz ony sýretshiniń saǵynyshynan izdeıikshi.
Taýǵa shyǵyp qaıtýǵa qalaı qaraısyz. Endigi alyp shyńdar aqjaýlyǵyn sheshken bolar. Alystan qarasańyz boıjetken qaraǵaılar men bozbala bulaqtar bozdónen bulttardyń baýyryna tyǵylyp jatqan syńaıly. Etegindegi gúlzar baq uıqydan oıanǵan shyǵar. Júrshi, kórip qaıtaıyq?!
Kóktemniń ıisi, kóńildiń hoshy ańqyǵan kórkem kartına. Kórgińiz kelse Ulttyq mýzeıge baryńyz. Aldyńyzdan menmundalap kóktem shyǵady. Eshkim joǵalmaǵandaı, eshteńe ózgermegendeı. Jan dúnıeńiz bir balqıtyny anyq. Qylqalam sheberi Jańataı Shardenovtiń «Taý bókterindegi gúldengen baq» týyndysy mereıli mezgildiń meıirimin tógedi. Biz umyta bastaǵan aıaýly sátterge qaıta ertip aparatyn sekildi.
Bul sýrettiń qupııasy nede deısiz ǵoı? Munda bir úlken saǵynysh bar. Sýretshi Reseıdegi Lenıngrad keskindeme, músin jáne sáýlet ınstıtýtynda oqyǵan. Birneshe jyl Máskeýde bilimin jetildiredi. Sodan da bolar shette júrgende onyń týǵan jerge saǵynyshyn sóıletken peızaj toptamalary jazylady. Ańsarǵa toly asqaq beıneler san alýan boıaýǵa ulasady. Sóıtip shyǵarmashylyq joly bútindeı sol baǵytqa buryldy. Mine, dál osy janrdan sheberdiń qoltańbasy anyq baıqaldy.
Ol óz shyǵarmashylyǵyna ımpressıonıstik batyl tús erejelerin jáne qylqalamnan bólek, qalaqshany paıdalanyp pastany jalpaq etip jaǵý tehnıkasyn engizdi. Avtordyń asqan sheber tehnıkasy reńk erekshelikteriniń balamalaryn asa sezimtaldyqpen meńgerýge múmkindik bergeni sondaı, peızajdary kádimgideı tynys alyp, hosh ıis tógedi. Aýa kenep betimen qalyqtap, tipti tabıǵat tynysy árbir fragmentten seziledi.
«Taý bókterindegi gúldengen baq» kartınasy – sheberdiń Almaty mańaıynda salǵan peızajdar toptamasynyń biri. Syzyqtarynyń tazalyǵy men boıaýlarynyń ótkirligi jaǵynan erekshe kóz tartady. Ile Alataýynyń shyńynda aq qar áli de jatyr. Ara-arasynda qaraıǵan jerlerdiń sulbasy kórinedi. Taý bókterinde gúldegen órikter men kógerip ósip kele jatqan ártúrli gúlderdiń názik shymyldyǵy shýaqty mezgildiń kelgenin habarlap turǵandaı. Oqyrmandy ózine elitip alady.
Bul kóktem de adamzattyń alǵashqy kóktemi sııaqty. Úmit artasyń, arǵy ómirińdi josparlaısyń, keleshekke jarqyn kózqaraspen qaraısyń. Sonysymen ystyq, kóńilge medet. Tabıǵattan úırenetin nársemiz kóp. Kartına sony meńzep turǵandaı. Jańa ómirdiń bastaýy sekildi.