Qurlyqtyq hokkeı lıgasynda (QHL) óner kórsetetin elordanyń «Barys» klýby maýsymaralyq úzilistegi alǵashqy transferin jasady.
Klýbtyń baspasóz qyzmeti habarlaǵandaı, elordalyq ujymnyń qatary shvesııalyq qorǵaýshy Erık Martınssonmen tolyqty. 28 jastaǵy hokkeıshi búkil mansabynda óz eliniń komandalarynda oınap, eki márte Shvesııa chempıonatynda jeńimpaz atanǵan. Byltyrǵy maýsymdy Erık Shvesııanyń elıtaly serııasynda baq synaıtyn «HV71» komandasynda ótkizdi. 56 oıynda muzaıdynǵa shyqqan ol 37 (5+32) upaı jınap, qorǵaýshylar arasynda eń kóp shaıba soqqan jáne úzdik nátıjeli pas asyrǵan oıynshy boldy. E.Martınsson aldaǵy bir maýsym «Barystyń» namysyn qorǵaıdy.
Aıta keteıik, maýsymaralyq úziliste ázirge «Barys» sapynan 7 hokkeıshi ketti. Atap aıtar bolsaq, qaqpashy Sergeı Kýdrıavsev, qorǵaýshylar Djessı Bleker, Dıllon Heterıngton, Aleks Lıntýnıemı, Alekseı Maklıýkov jáne shabýylshylar Lınýs Vıdell men Pavel Akolzın kelesi maýsymdy ózge klýbtarda ótkizedi.