Atyraýda koronavırýsqa qarsy vaksına saldyrýdyń mańyzyn túsindiretin mobıldi top quryldy, dep habarlaıdy Egemen.kz.
Mobıldi aqparattyq top músheleri aldymen S.Muqashev atyndaǵy kolledjdiń ujymymen kezdesý ótkizdi. Top quramynda oblystyq densaýlyq saqtaý basqarmasynyń basshysy Ashan Baıdýálıev, óńirdiń bas memlekettik sanıtarııalyq dárigeri Mádenıet Tanaýov, sondaı-aq oblystyq bilim basqarmasynyń basshysy Sátqan Esenǵalıev bar.
Oblystyq densaýlyq saqtaý basqarmasynyń basshysy Ashan Baıdýálıevtiń aıtýynsha, óńirde koronavırýsqa qarsy vaksına alǵandar sany 50 myńnan asty. Vaksınanyń tolyq komponentin saldyrǵandar qatary 20 myńnan astam adamdy qurap otyr.
«Atyraý oblysyna 1 aqpan men 26 mamyr aralyǵynda 74 200 doza vaksına jetkizildi. Mamyrdyń sońyna deıin aqparattyq-túsindirý jumystarynyń nátıjesinde vaksına dozalarynyń teń jartysy ıgerildi. Halyqqa túsindirý jumysy óte qajet. О́ıtkeni, turǵyndar vaksınalaý týraly barlyq aqparatty tıisti basqarma basshylarynyń ózinen estigisi keledi», deıdi Ashan Baıdýálıev.