Arqarly asýynda tabylǵan petroglıfterdi saqtaý máselesi ýákiletti memlekettik organdardyń baqylaýyna alyndy. Bul jaıynda Májilis depýtattarynyń saýalyna QR Premer-Mınıstriniń orynbasary Eraly Toǵjanovtyń jaýabynda aıtylǵan, dep habarlaıdy Egemen.kz.
«Almaty oblysynyń Kerbulaq aýdanynda tabylǵan petroglıfterdi saqtaý máselesi ýákiletti memlekettik organdardyń baqylaýyna alyndy. Búgingi kúni ejelgi petroglıfterdiń saqtalýyn qamtamasyz etý maqsatynda naqty is-sharalar qabyldanýda. Atap aıtqanda, Arqarly asýynda qıyrshyq tastardy óndirýmen aınalysatyn kásiporyndarǵa berilgen arheologııalyq eskertkishter ornalasqan jerler memlekettiń ıeligine qaıtarylady. Arqarly petroglıfteriniń zańnamada belgilengen tártippen mártebesi anyqtalǵanǵa deıin olar tarıhı-mádenı mura obektileriniń aldyn-ala esepke alý tizimine engizildi», delingen vıse-premerdiń jaýabynda.
Onyń atap ótýinshe, «Tarıhı-mádenı mura obektilerin qorǵaý jáne paıdalaný týraly» Zańyna sáıkes petroglıfterdiń mártebesi týraly túpkilikti sheshim qabyldanǵanǵa deıin olar tarıh jáne mádenıet eskertkishterimen birdeı qorǵalady. Osyǵan oraı eskertkishterge qaýip tóndiretin jumystar toqtatylǵan jáne olardyń qorǵaýǵa alynǵany týraly taqtalar ornatylǵan.
«2021 jyldyń sáýir-mamyr aılarynda Almaty oblysynyń ákimdigi men Á.H. Marǵulan atyndaǵy Arheologııa ınstıtýtynynyń mamandary Arqarly petroglıfterine zertteý jumystaryn júrgizdi. Zertteýdiń negizinde anyqtalǵan eskertkishterge aldaǵy ýaqytta qujattandyrý (pasportızasııalaý) jumystary júrgiziledi. Anyqtalǵan eskertkishterdi qorǵalýyn uıymdastyrý úshin tıisti bıýdjettik ótinim ázirlenip, oblys máslıhatynyń otyrysynda qarastyrylady. Zańnamada qarastyrylǵan rásimder oryndalǵannan keıin Arqarly petroglıfteri Almaty oblysynyń jergilikti mańyzy bar tarıh jáne mádenıet eskertkishteriniń tizimine engiziledi. Mádenıet jáne sport mınıstrligi men Almaty oblysynyń ákimdigine Arqarly petroglıfterin qorǵaý máselesin turaqty baqylaýda ustaý tapsyryldy», dep atap ótedi Eraly Toǵjanov.