Tasbaqa tirlik. Qazaqtyń tirligine qatty uqsaıdy. Mımyrt ta jaıbasar. Baǵyty bar, biraq júrisi baıaý. Ýaqyttyń uıytqyp soqqan jeli tóńkerip tastasa eken dep tileısiń. Aýzyna tistegen shóbi armanyna jetkize qoıar ma eken?! Ony da oılaısyń. Úzdiksiz aýyr, shaban júris áli aıaqtalǵan joq. Qazaq tasbaqanyń ústinde uıyqtap jatyr. Astyndaǵy saýyt qatty bolǵanymen, uıqysy tátti.
Tasbaqanyń shóbin alǵan adamnyń qalaýy bolatyny týraly ańyz bar. Jazýshy Ábish Kekilbaev «Tasbaqa shóbi» atty áńgimesine arqaý bolǵan ápsana. Úmitsiz kele jatyp, kenet úmiti oıanǵan pendeniń taǵdyryn sóıletedi. Alyp tasbaqany besik etken sábıdiń áreketindeı oıly. Biz nazarlaryńyzǵa usynǵan, mundaǵy «Kishkentaı ımperator» kartınasy sony meńzeıdi. Belgili sýretshi Dáýren Qasteevtiń týyndysy ańyzben astasyp jatyr.
Vertıkal pishindi kartınadan býyrqanǵan sary-jasyl boıaýlardyń arasyndaǵy tasbaqa saýytynyń ústinde uıyqtap jatqan kishkentaı balany kóremiz. Bul kórermenniń qyzý pikirin týdyratyn erekshe mańyzdy ári fılosofııalyq týyndy óz sezimderińdi jınaqtap, tolǵanýǵa májbúrleıdi.
Álemdik túsinikte tasbaqanyń róli mıftik qubylystarǵa ıe. Ol ejelgi janýarlar túrine jatady jáne álemdegi kóptegen mádenıettiń sımvoly retinde de máni joǵary. Shyǵys halyqtary jalpy álem jaratylysynyń bastalýyn osymen baılanystyrady. Ejelgi grekter tasbaqa fızıkalyq úrdisterdiń turaqtylyǵyn bildiredi dese, Úndistan turǵyndary osy kúnge deıin tasbaqa jer betindegi barlyq jandy nárseniń túp anasy dep sanaıdy.
Ejelgi mıfter tasbaqanyń saýyty kóktiń aspan kúmbezi, al sýdyń ortasynda qalqyp júrgen Jer bolsa, onyń tirshiligi dep aıtady. Ony otbasyna molshylyq pen súıispenshilik ákeledi dep sanaǵan. Sımvoldyq analogııanyń qytaılyq júıesinde tasbaqa qasıetti bes janýardyń biri retinde soltústikti, sýdy jáne qysty bildirse, al onyń saýytynyń synyǵyn sáýegeılikke paıdalanǵan. Bul janýar uzaq ómir súrýdi, kemeńgerlikti, turaqtylyqty, tabandylyqty, densaýlyqty jáne qorǵaýshyny bildiredi.
Qytaıda otbasyndaǵy jalǵyz balany «Kishkentaı ımperator» dep ataǵan, óıtkeni mundaı balalarǵa bárine ruqsat etiledi. Qytaı balasy ata-anasy da, muǵalimderi de, ótken-ketken de, tipti kún de barlyǵy sol balanyń tóńireginde aınalýy qajet búkil álemniń kindigine aınalady.
Sýretshi jasyl tústiń sýyq reńkterin jyly sary túspen keremet úılestire bilgen. Bizge sábıdi kún sáýlesiniń jylýy qorshap turǵandaı. Al kári tasbaqa «Kishkentaı ımperatordy» qaýip-qaterden, taýqymetten qorǵap ýaqyt pen keńistikte baıaý qozǵalyp bara jatqandaı kórinedi.
Bilesiz be, tasbaqa jerdiń astynan súlderin súıretip áreń shyqqanda, daýyl tasbaqanyń ústiniń shańyn qaǵý úshin soǵady eken. Eń ǵajaby tasbaqanyń daýyly tasbaqadan basqanyń bárin kóterip ketetin qudiretke ıe. Tasbaqa ornynda qalady, basqany kókten izde, jerden izde, tappaısyń. Qazaq emes deńizshi, naq ózi. Qazaq degen – dál qazir «kishkentaı ımperator» sekildi.