«Qazaqstan barysy» mereıtoılyq týrnıri 4 shilde kúni Nur-Sultan qalasynda Jaqsylyq Úshkempirov atyndaǵy jekpe-jek saraıynda ótedi. Bul týraly Ortalyq kommýnıkasııalar qyzmetinde ótken brıfıngte «Qazaq kuresi» qaýymdastyǵynyń sportty damytý jónindegi dırektory Baqdáýlet Sábıtov aıtty, dep habarlaıdy Egemen.kz.
Alaıda elorda «qyzyl aımaqta» bolǵandyqtan, sport keshenine kórermenderdiń tek 20%-y ǵana kire alady. Kirýge «Ashyq» qosymshasy arqyly ruqsat etiledi.
«Basqa oblystar men qalalardyń jankúıerlerin týrnırdi teledıdardan tikeleı efırde kórýge shaqyramyz. Jekpe-jekti «Qazaqstan» jáne «Qazsport» arnalary, reseılik «Match! Planeta» jáne «Boks TV», sondaı-aq túriktiń «TRT AVAZ» telearnalary kórsetedi. Jarys 4 shilde kúni saǵat 13:00-de balýandardyń jerebe tastaýynan bastalady. Jekpe-jekter alty saǵatqa sozylady dep kútilýde», dedi spıker.
Resmı salmaq ólsheý rásimi 2 shilde kúni saǵat 19.00-de «Han Shatyr» SOO-da ótedi.