Oral qalasynyń ortalyq demalys saıabaǵynda «Kitap – sarqylmas qazyna» atty jármeńke ótti. Is-sharaǵa jergilikti qalamgerler de qatysyp, ashyq aspan astynda oqyrmandarymen júzdesti.
Oral qalalyq kitaphanalar júıesi bul is-sharany el Táýelsizdiginiń 30 jyldyǵy qarsańynda jáne 2021 – «Balalar ádebıeti» jyly aıasynda uıymdastyrǵan eken. Oral qalasy ákiminiń orynbasary Erlan Ǵalıev, qalalyq mádenıet jáne tilderdi damytý bóliminiń basshysy Serik Qaıyrlıev, qalalyq kitaphanalar júıesiniń meńgerýshisi Gandı Izturǵanqyzy is-sharaǵa bastan-aıaq qatysyp, qoldaý kórsetti. Is-shara barysynda qaladaǵy «Jáńgir han», «Dana» kitap dúkenderi, «Zerek» oqý ortalyǵy, «Aığanym», «Qýanysh» jeke kásipkerleri saıabaq kelýshilerine kitap ónimderin usyndy. Mektep oqýshylary arasynda «Meniń súıikti keıipkerim» atty jas sýretshiler baıqaýy uıymdastyryldy. Al oqyrman qaýymmen kezdesýge Aqjaıyq qalamgerleriniń aqsaqaly, aqyn Aıtqalı Nárikov, aıtys ardageri Sholpan Qydyrnııazova, Qazaqstan Jazýshylar odaǵynyń músheleri Darıǵa Mushtanova, Talap Taımasuly, Baýyrjan Ǵubaıdýllın sekildi jergilikti qalamgerler keldi.
«Bul is-sharanyń maqsaty – oqyrmandardyń kitapqa degen qyzyǵýshylyǵyn arttyrý, sonymen qatar baspalardyń, avtorlardyń, mádenıet jáne bilim berý mekemeleriniń, kitap satýshy uıymdardyń shyǵarmashylyq jáne iskerlik yntymaqtastyǵyn nyǵaıtý», deıdi Gandı Izturǵanqyzy.
Kitap jármeńkesiniń qalalyq mádenıet jáne demalys saıabaǵynda, ashyq aspan astynda ótkizilgeni jıylǵan halyqqa da, qalamgerlerge de erekshe áser etti. Jergilikti aqyndardyń óleńderinen quralǵan poetıkalyq kórinisti Oral qalalyq jastar mádenıet úıiniń ártisteri «tiri áýenmen» árlep turdy. Úlkender jaǵy poezııa alańqaıyna úıirilse, balalar jasyl shalǵynǵa jata ketti. Saıabaq basshylyǵy bul jaǵdaıdy da oılastyrǵan eken, jerge otyram deýshilerge arnaıy kilemsheler taratty. Ádemi jıynnyń shyraıyn lezde tógip ótken aq jańbyr da buza almady.
– Osyndaı kitap jármeńkesin uıymdastyrǵan qalalyq kitaphanaǵa myń alǵys aıtamyn. Formaty erekshe is-shara boldy. Bul kúngi alǵashqy oqyrmanym Araılym degen qyzyma qoltańbammen qosa aq batamdy berdim. Jazýshy men kitapty oqyrmanymen tabystyrǵan keremet kezdesý boldy, – deıdi qalamger Darıǵa Mushtanova. Darıǵa Ǵazezqyzy búgingi kezdesýden erekshe shabyt alǵanyn, birazdan beri qańtarylyp qalǵan qalamyn qaıta qolǵa alyp, bastap qoıǵan shyǵarmasyn aıaqtaýǵa asyǵyp otyrǵanyn jasyrmady.
Balalar jazýshysy Baýyrjan Ǵubaıdýllın de jas urpaqty kitap qazynasymen, ádebıet álemimen tabystyrý úshin osyndaı kreatıvti is-sharalardy kóbirek uıymdastyrý qajettigin aıtty.
– Biz birer jyldan beri Oral qalasynda kitap dúkenin ashyp, elimizdiń túrli baspalarynan eń úzdik, suranysqa ıe degen ónimderin ákelip jatyrmyz. Árıne, bizdiń «DANA» rýhanı ortalyǵyn qazirdiń ózinde oraldyqtar jaqsy bilip qaldy. Degenmen osyndaı is-sharalar óte kerek eken. Halyq kóp jınalatyn oryndarǵa jıi shyǵyp, ádebıetti, kitap álemin nasıhattaýdyń qajettigine kózim anyq jetip otyr, – deıdi Jantas Safýllın.
Jas aqyn Dáýren Shamurat júrgizgen emen-jarqyn kezdesýde ár qalamger óziniń shyǵarmashylyq josparlaryn bólisip, óleń oqydy. Is-shara sońynda ádebıet keshinen áserlengen halyq arasynan sýyrylyp shyǵyp, óz óleńderin oqyp bergen oqyrmandar da boldy. «Osyndaı shynaıy kezdesýlerdi jıirek ótkizý kerek eken» degen oıdy uıymdastyrýshylar da, qalamgerler de kóńiline túıip ketti.
Aıtpaqshy, osy kitap jármeńkesi kezinde «Meniń súıikti keıipkerim» atty sýretshiler baıqaýy ótkenin aıtqan edik. Shara sońynda baıqaý qorytyndylanyp, kóńil túkpirindegi keıipkerin alýan túspen qaǵaz betine kóshirgen balǵyn sýretshiler Aısulý Hasanǵalıeva, Aıqyn Ádiluly, Saıagúl Qulmuhanova, Janerke Tilekqabyl, Mádına Berkin, Sofıa Shýkına, Álına Ishkenova, Marııa Klımova, Álına О́teýova arnaıy syılyqtarǵa ıe boldy.
...Bir kezderi ataqty aqyn Qasym Amanjolov:
«Shaǵannyń boıy kók shalǵyn,
Shalqamnan jatqam
shańqaı tús,
Gúl bolyp meniń qushaǵym,
Keýdemde qonǵan bulbul qus!» – dep jyrlaǵan eken. Araǵa bir ǵasyr salyp dál osy jerde ótken keremet is-sharaǵa qatysqan ár jannyń da keýdesinde bir-bir bulbul saırap ketkendeı kórindi.
Batys Qazaqstan oblysy