Arqalyq qalalyq qazaq jasóspirimder drama teatry jazýshy Jumagúl Soltynyń «Jyndy kóbelek» pesasyn sahnalady. Respýblıkalyq baıqaýda júlde alǵan bul shyǵarma ózimiz ómir súrip otyrǵan búgingi qoǵamnyń kókeıkesti máselesin qozǵaıdy.
Arqalyq qalalyq qazaq jasóspirimder drama teatry jazýshy Jumagúl Soltynyń «Jyndy kóbelek» pesasyn sahnalady. Respýblıkalyq baıqaýda júlde alǵan bul shyǵarma ózimiz ómir súrip otyrǵan búgingi qoǵamnyń kókeıkesti máselesin qozǵaıdy. Spektakldiń premerasyn kórermender jyly qabyldady. Ásirese, qaladaǵy stýdent jastar taıly-taıaǵyna deıin qalmaı kelip kórdi. Keıipkerlerdiń barlyǵy da aınalamyzda júrgen adamdar. Dáýren qaıtys bolǵan synyptasy Darıǵanyń ata-anasynyń senimine kirip, solardyń arqasynda mańdaıy tership eńbek etpeı, iship-jegenine máz bolady. «Aýyrdyń astymen, jeńildiń ústimen» ómir súrý ustanymyn ustaǵan qos jigit Dáýren men Ermek aqyrynda ózderiniń ómirge degen jeńil kózqarasynyń, aram pıǵylynyń qurbany bolady. Bul ómirde ar tazalyǵy jáne eńbek qana adamdy baqytqa jetkizedi. Dáýrenniń áıeli Sábıra naq osyndaı adam. Dáýren balalarymen jylatyp tastap ketkende, aýylda qalǵan Sábıra barlyq qıyndyqtardy jeńip, olardy aman-esen ósiredi. Aqyrynda mashına qaǵyp ketip, múgedek bolyp, qaıyrshy dárejesine jetken Dáýrendi de dalaǵa qaldyrmaı, aýylǵa alyp ketedi. Avtor eńbek pen ar-uıat bar jerde meıirim de bolady degen oı tastaıdy. Sonymen qatar, qazaq qyzdarynyń emendeı myqtylyǵyn taǵy bir qyrynan kórsetip, qaıran qaldyrady. Biri múgedek, biri nashaqor bolyp tynǵan Dáýren men Ermek sekildi jany taza emes, jurttyń adal senimin attaǵandardy ýaqyttyń ózi-aq jazalaıdy. Darıǵanyń úsh inisi Saǵat, Mınýt, Sekýnd osyny eskertetindeı.
– Bul qoıylym – áleýmettik drama. Shyǵarma halqymyz aıalap kelgen bar jaqsy qasıet qazaqtyń altyn besigi – aýylda ekenin aıtady. Pendeniń barlyǵyna dúnıe esigi ashyq. Onda adamnyń bárine birdeı jaqsylyq ta, qıyndyq ta kóldeneń turady. Sol tusta bireý shyǵar joldy kóredi, bireý kóre almaıdy. Avtor óz oı-nıetiniń tumanyna adasqandardy jaryqqa qarsy ushqan jyndy kóbelekke teńeıdi. О́mirde olardyń ózderi de ornyn tappaıdy, qalyptaspaıdy, qoǵamǵa da bir tıyn paıdasy tımeıdi. Jalpyldap ushyp júrip, ózderin ózderi joıady. Qoıylymda adamnyń qandaı bolýy onyń ózine baılanysty degen oı tastadyq, – deıdi rejısser Sálıma Tasemenova.
Dáýrenniń rólin halyqaralyq «Shabyt» baıqaýynyń laýreaty, talantty akter Nurlan Baıshın somdady. Sábırany oblystyq «Mesenattar klýby» syılyǵynyń laýreaty Kúláı Ahmetova, Ermekti Álibek Mametov oryndady.
– Aıtary tushymdy qoıylymdy kórermenge jetkizgen akterlerdiń barlyǵy da tamasha oınap shyqty, sýretshimiz Erkin Mergenovtiń sahnalyq dekorasııasy da sátti shyqty, –deıdi rejısser Sálıma Beksultanqyzy.
Názıra JÁRIMBETOVA,
«Egemen Qazaqstan».
ARQALYQ.