El ekonomıkasyn ártaraptandyrý – Elbasy N.Nazarbaevtyń Jarlyǵymen bekitilgen 2010-2014 jyldarǵa arnalǵan memlekettik údemeli ındýstrııalyq-ınnovasııalyq damý baǵdarlamasynyń basty maqsattarynyń biri. Bul jóninde jańa jyl qarsańyndaǵy búkilhalyqtyq tikeleı telekópirde de taǵy bir qadap aıtyldy.
El ekonomıkasyn ártaraptandyrý – Elbasy N.Nazarbaevtyń Jarlyǵymen bekitilgen 2010-2014 jyldarǵa arnalǵan memlekettik údemeli ındýstrııalyq-ınnovasııalyq damý baǵdarlamasynyń basty maqsattarynyń biri. Bul jóninde jańa jyl qarsańyndaǵy búkilhalyqtyq tikeleı telekópirde de taǵy bir qadap aıtyldy. Osy oraıda, «Altyn sapa» júldesiniń ıegeri retinde bizdiń ujymǵa erekshe jaýapkershilik júkteledi.
Elektrovozdardy jóndeý men ony jańǵyrtý baǵytyndaǵy biregeı kásiporyn sanalatyn zaýytymyz «Indýstrııalandyrý kartasy» sheńberinde júıeli jumystar atqarýda. Biz baǵdarlama jarııalanǵan kúnnen bastap tıimdi ınnovasııalyq ınfraqurylym qalyptastyrýǵa tyrystyq. Investısııalyq quıylymdar men óz kúsh-qarymymyzdy sarqa paıdalana otyryp galvanıkalyq, tústi metall quıý sehtaryn ashyp, rezınotehnıkalyq jáne plastmassa buıymdaryn daıyndaıtyn bólimshelerdi keńeıttik. Sondaı-aq, kompressorlar men redýktorlardy, rotorlardy kúrdeli jóndeý ýchaskelerin iske qosyp, usta-mehanıkalyq, elektromashına sehynyń ekinshi korpýsyn tolyqtaı jańǵyrttyq.
Innovasııalyq qyzmetti belsendi júrgizýdiń arqasynda zaýytymyzda zamanalyq ǵylym men tehnıka jańalyqtaryna keńinen óris ashyldy. Munyń bir mysaly retinde uzaq jyldar qoldanysta bolǵan «VL-60» elektrovozdaryn búgingi kún talabynda jańǵyrtqanymyzdy aıtýǵa bolady. Sondaı-aq, «VL-80» serııaly elektrovozdardyń jylý júıeleri men pnevmatıkalyq tejegishterin qýattandyrý arqyly júk jáne jolaýshy tasymalyndaǵy lokomotıvter senimdilikpen paıdalanylýda. Synaqtardan súrinbeı ótken mashınalarymyzdyń dızaındyq bezendirilýi, basqarýǵa qolaılylyǵy kóz tartady jáne olardyń toqtaýsyz qyzmetine 20 jyldyq kepildik bere alamyz. Munyń ózi bizde jasalǵan elektrovozdardyń múldem jańa, ıaǵnı, qazaqstandyq modelge saı ekendigin dáleldeıdi.
2012 jyly Qazaqstannyń qaryshty trassalaryna jańa markadaǵy segiz lokomotıvti shyǵarsaq, 2013 jyly onyń sany bes danaǵa artyp otyr. Osy oraıda, buryn mashınıstiń basqarý kabınasy Ýkraınadan tasymaldansa, byltyr konstrýktorlyq-tehnologııalyq bıýro men eksperımentti seh jáne qurylys tobynyń mamandary atalǵan jabdyqtardy óz qoldarymen jasap shyǵaryp, óndiriske engizgenin eske salǵan jón. Jalpy, jańa baǵdarlama zaýyt ónertapqyshtaryn jelpiniske túsirgenin aıtqym keledi. Dástúrli bastamanyń jandanýy nátıjesinde elektrovozdarǵa qajetti jabdyqtar men tetikterdiń 180-nen astam túri ózimizde jasalýda. Budan túsken ekonomıkalyq tıimdilik 43 mıllıon teńgeni qurap otyr.
Halyqaralyq standarttaǵy «ISO 9000» sapa sertıfıkatymen jumys isteıtin ujymymyz jańa jylda da serpindi isimen tanylyp, básekelestikke qabilettiligin arttyra bermek. «Qazaqstan-2050» Strategııasynyń basty talaby da osy.
Nurmahan PÝLATOV,
Atbasar elektrovoz jóndeý
zaýytynyń dırektory.
Aqmola oblysy.