Keshe, qańtardyń 11-i kúni Izraıldiń burynǵy premeri Arıel Sharon qaıtys boldy. Bul týraly ITAR-TASS agenttigine silteme jasaǵan Ras.kz habarlady.
«Izraıldiń eks-premeri Arıel Sharon qaıtys boldy. Muny baspasóz ókilderine Sharonnyń uly Gılad jetkizdi. «Ol ózi qalaǵan ýaqytta ketti» dedi Gılad Sharon», – delingen habarlamada.
«Tel a-Shomer» qalpyna keltirý klınıkasynyń dırektory Shlomo Noı málimdegendeı, Izraıldiń eks-premeri «balalarynyń qorshaýynda typ-tynysh jaǵdaıda» ómirden ótken. Izraıl televıdenıesiniń málimeti boıynsha Sharonnyń júregi 13:58 (Astana ýaqytymen – 18:58) saǵatta toqtaǵan.
Eks-premerdiń densaýlyq jaǵdaıy sońǵy kúnderi kúrt nasharlaǵan. 85 jastaǵy pasıent Tel-Avıvtegi «Tel a-Shomer» klınıkasynyń «Shıva» medısınalyq ortalyǵynda jatty.
Arıel Sharon sońǵy 8 jyl boıynsha es-tússiz, koma jaǵdaıynda boldy. Izraıl úkimeti basshysy ornynda 2001-2006 jyldary bolǵan Sharon 2005 jyldyń jeltoqsan aıynda mıkroınsýlt alyp, aýrýhanaǵa jatqyzyldy. Biraq eki kúnnen keıin emhanadan shyǵyp jumysqa qaıta qosyldy. Al bir aıǵa jetpes ýaqytta – 2006 jylǵy 4 qańtarda keń aýqymdy ınsýltqa urynyp, birden komaǵa túsip ketti. Sodan beri es bilmeıtin óli men tiriniń arasynda qybyrsyz jatty. Ol jasandy tynys aldyrý apparatymen ǵana dem aldy jáne óz betinshe tamaqtana almady. Jaqynda balalary jasandy tynys aldyrý apparatynan ajyratý jaıyn qozǵady.
Mine, 8 jylǵy es-tússiz ómirdiń de sońyna núkte qoıyldy. Kezinde Palestına men arab máselelerine kelgende, kóp keri áreketter jasap, zııan keltirgen eks-premer ǵumyrynyń sońǵy on jylǵa jýyq ýaqytyn osylaı qaıǵyly jaǵdaıdy ótkizip, abyroısyzdaý aıaqtady.
Aıdar О́risbaev.
Derekkóz: Ras.kz
Foto: Gazeta.ru