QR Prezıdentiniń kómekshisi Erlan Qarın 25 shildedegi ákimder saılaýynda qoldanylǵan daýys berý bıýlleterine «Bárine qarsymyn» baǵanyn engizýdiń alǵashqy nátıjeleri týraly aıtty, dep habarlaıdy Egemen.kz.
«Aýyl ákimderiniń ótken tikeleı saılaýynda alǵash ret saılaýshylarǵa «Bárine qarsy» daýys berý múmkindigin beretin norma iske qosyldy. Memleket basshysy mundaı normany saılaý zańnamasyna engizý qajettigi týraly bıyl qańtar aıynda Parlament Májilisiniń jańa shaqyrylymnyń birinshi sessııasynda málimdegen bolatyn», dep jazdy Prezıdent kómekshisi Telegram kanalynda.
Onyń aıtýynsha, «Bárine qarsymyn» baǵany saılaýshylar pikiriniń barlyq spektrin eskerýge múmkindik berdi.
«Bul baǵan azamattardyń balama ustanymyn zańdy túrde bildirý quqyǵyn keńeıtedi. Mysaly, BAQ-ta habarlanǵandaı, Qaraǵandy oblysy boıynsha «Bárine qarsymyn» baǵanyn Aqtoǵaı aýdanynyń Shashýbaı kentinde 116 adam belgilengen. Bul daýys bergenderdiń 7%-y. Al búkil Mańǵystaý oblysynda bul quqyqty tek 279 adam paıdalanǵan», dep jazady Eran Qarın.
Prezıdent kómekshisi ákimder saılaýynda Prezıdent júrgizip otyrǵan saıası reformalardyń tıimdiligin kórsetip, olardyń barlyq tarmaqtary praktıkada dáıekti túrde iske asyrylyp jatqanyna kóz jetkizgenin aıtady.