Almaty oblysynda mal urlyǵy tıylmaı tur. Bul týraly «KTK» telearnasy habarlady.
Urylardyń turǵyndardy basynǵany sonshalyq, tapa-tal túste mal qoralaryna kirip, bir úıdiń 46 iri qara malyn urlaǵan. Jalpy, 3 aı ishinde Qaraoı aýylynan 130-ǵa jýyq tórt túlik qoldy bolypty. Bir tańqalarlyǵy, turǵyndar urylardyń kim ekenin polıseılerge aıtqanymen, olar «naqty dáıek joq» degen jeleýdi alǵa tartyp, shara kórýge asyqpaǵan kórinedi.
«Uryny men ózim ustap alyp edim. Biraq, ýchaskelik ınspektordy shaqyrǵanda ol aryzymdy qabyldamady. Aıtýynsha, urlanǵan maldyń baǵasy nebári 450 myń teńge, sondyqtan bul qylmystyq is qozǵaýǵa jatpaıtyn urlyq eken. Kemi 900 myń bolǵanda ǵana is qozǵalady deıdi. Osyndaı da sóz bola ma ózi? Bir qap kartop urlasań da sottaıdy ǵoı», - deıdi sharýa qojalyǵynyń ıesi Narıman Gýseınov.
Turǵyndar aıtqan uryny quqyq qorǵaý qyzmetkeri sol kúni bosatyp jibergen. Qazir onyń qaıda ekenin eshkim bilmeıdi.
Ile aýdandyq ishki ister bóliminiń bastyǵy Talǵat Berkimbaevtyń málimdeýinshe, mal urlaǵan kúdikti syrttan kelgen. Sondyqtan sharýalarmen birlesip, kúzet qyzmetin kúsheıtetin bolyp otyr.
Ámirhan Almaǵanbetov.
Derekkóz: «KTK» telearnasy
Foto: «KTK» telearnasy.