Elordadaǵy Ulttyq mýzeıdiń tórinde bıyl týǵanyna 160 jyl tolǵan ataqty kúıshi, Qazaqstannyń halyq ártisi Dına Nurpeıisovanyń qolynyń taby qalǵan dombyrasy tur.
Toǵyz jasynan Qurmanǵazy, Dáýletkereı, Músiráli, Uzaq, Álikeı, Túrkesh, Esjan, Baıjuma, Balamaısan sekildi sańlaq kúıshilerdiń shyǵarmalaryn qulaǵyna sińirip ósken jas kúıshiniń ataǵy, ózi týǵan Naryn qumyna erte jaıyldy. Daryndy órenniń atyn estigen Qurmanǵazy atamyz Dınanyń kúı shertkenin kórý úshin onyń aýylyna kelip, jas kúıshiniń ónerine tánti bolyp, batasyn berip, aqylshy ustaz boldy. Osylaı kúı atasynyń batasyn alǵan Dınanyń ónerdegi joly dańǵylǵa aınaldy. Tarlan kúıshi óz shyǵarmashylyǵynda Qurmanǵazynyń jigerli kúılerimen birge Dáýletkereıdiń názik lırıkasyn ushtastyryp, biregeı týyndylardy ómirge ákeldi.
Bizdiń maqalamyzǵa sebep bolǵan kúıshiniń dombyrasyn 1939 jyly Arystan Ermekov degen sheber qaıyń aǵashynan jasaǵan. Dombyra eki shekti, shanaǵy sopaq, moıny jińishke bolyp keledi. Aspaptyń betki jaǵy ulttyq naqyshtaǵy jáne gúl tárizdes oıýlarmen órnektelgen. Jádigerdi 2003 jyly Prezıdenttik mádenıet ortalyǵynyń materıaldyq mádenı-turmystyq zattar qoryna belgili mýzyka zertteýshisi, professor Bolat Sarybaev tapsyrǵan. Dına apamyz Ekinshi dúnıejúzilik soǵys kezinde biraz ýaqyt Sarybaevtar otbasymen kórshi turypty. Sonda bala Bolattyń mýzykalyq qabiletin baıqaǵan ol kisi oǵan óziniń dombyrasyn syıǵa tartyp: «О́mirimdegi eń asylym – osy dombyra, kózimdeı kórip júr» dep batasyn beripti. Dáýlesker kúıshiniń osy bir aýyz sózi Bolat Sarybaevtyń jadynda qalyp, onyń keıin qazaqtyń mýzykalyq aspaptaryn jınap, án-kúı murasyn zertteýine túrtki bolǵan.
Búginde Dına Nurpeıisovanyń kıeli dombyrasy – Ulttyq mýzeıdiń qundy jádigerler qatarynda sanalady.