«Astana Opera» Kameralyq zaly Kúlásh Baıseıitovanyń esimimen ataldy. Osyǵan oraı 13 qyrkúıekte «Qazaqtyń bulbuly» konserti ótti.
Búgingi tańda «Astana Opera» Kameralyq zaly – kóptegen mýzykanttar óner kórsetýge umtylatyn elimizdiń bedeldi konserttik alańyna aınaldy. Zal klassıkalyq murany saqtap, jańaryp otyratyn qazaqstandyq qoǵamnyń rýhanı suranystaryn iske asyratyn qazaq jáne álemdik mýzyka mádenıeti dástúrlerin kórsetedi. Atalǵan sahnada Qazaqstannyń ǵana emes, dúnıe júziniń áıgili ártisteri óz ónerlerin pash etip júr.
«Kameralyq zaldyń Kúlásh Baıseıitova zaly bop atalýy biz úshin zor qurmet. Ol KSRO halyq ártisi joǵary ataǵynyń alǵashqy ıegerleriniń jáne sol ataqty jas kezinde alǵan tulǵalardyń biri. Onyń tabıǵı mýzykalyq daryny men álemdik mýzykanyń asyl qazynasyna qaldyrǵan beıneler shoǵyry bizdiń jadymyzda. Ol somdaǵan Shuǵanyń beınesi ánshiniń sheberlik turǵydan óskenin kórsetti, al E.G.Brýsılovskııdiń «Qyz-Jibek» operasyndaǵy Jibektiń partııasy ánshige klassıkalyq opera óneriniń shyńyna kóterilýge jol ashty», dedi teatr dırektory Ǵalym Ahmedııarov.
Osy mańyzdy oqıǵa qarsańynda áıgili ánshiniń qyzy – Qarlyǵash Baıseıitova áıgili ánshiniń balalyq shaǵy týraly jyly estelikterimen bólisti, meıirimdi jáne qamqor anasynyń arqasynda qandaı baqytty bolǵany týraly áńgimeledi. Ol elordanyń mádenı ómiri úshin «Astana Opera» Kameralyq zalynyń aty ańyzǵa aınalǵan tulǵa – Kúlásh Baıseıitovanyń esimimen atalýy úlken qýanysh ekenin atap ótti. Qyzy anasynyń alǵys hattarynyń birneshe kóshirmesin, sondaı-aq ánshiniń jeke muraǵatynan alynǵan fotosýretti teatrdyń art-galereıasyna tapsyrdy. Aıtýly oqıǵaǵa oraı teatr foıesinde kórme ótti.
Kameralyq zalda óskeleń urpaqqa arnalǵan túrli baǵdarlamalar, sonyń ishinde jaqynda Mádenıet jáne sport mınıstrligi men Nur-Sultan qalasy ákimdigimen birlesip qurylǵan «Teatr sabaǵy» jobasy júzege asyrylýda. 2019 jyldan beri Kameralyq zalda «Piccolo teatry» nemese «Shaǵyn teatr» jobasy tanystyryldy, onda opera-býffanyń eki tusaýkeseri sátti ótti.