«Táýelsizdik – bizdiń eń qasterli qundylyǵymyz. Egemendik degenimiz – jalań uran men jalyndy sóz emes», dedi Qazaqstan Respýblıkasynyń Prezıdenti Qasym-Jomart Toqaev. Memleket basshysy tilge tıek etkendeı bıyl Táýelsizdigimizge 30 jyl, sonymen qatar Qallekı teatryna da 30 jyl.
Egemendigimizdiń tól qurdasy Q.Qýanyshbaev atyndaǵy Memlekettik akademııalyq qazaq mýzykalyq-drama teatry Elbasymyzdyń bastamasymen, el Prezıdentiniń qoldaýymen jańa ǵımaratqa kóship, shyǵarmashylyq jolynda jańa beleske qadam basty.
Sondaı-aq Prezıdent: «Bolashaǵyn Otanymyzben baılanystyratyn árbir azamat qazaq tilin úırenýge den qoıýy tıis. Bul – otanshyldyqtyń basty belgisi deýge bolady. Qazaq tili, shyn máninde bilim men ǵylymnyń, mádenıet pen is júrgizýdiń tiline aınalyp jatyr», dep basa aıtty. Al teatr – tilimizdiń keń nasıhattalyp, órisin keńeıtýine jol ashar kıeli shańyraq.
Memleket basshysy 2022 jyldan 2025 jylǵa deıin mádenıet qyzmetkerleriniń, muraǵatshylardyń, kitaphanashylardyń, tehnıkalyq qyzmetkerlerdiń jalaqysyn jyl saıyn orta eseppen 20 paıyzǵa ósirýdi tapsyrdy. Demek Prezıdentimizdiń qoldaýyn úlken jaýapkershilikpen sezinip, mádenıet pen ónerimizdiń órkendeýi jolynda erinbeı eńbek etýge tıispiz.
Qýandyq QYSTYQBAEV,
Qazaqstannyń eńbek sińirgen qaıratkeri