Eń aýyr jalǵyzdyq – kóp ishindegi jalǵyzdyq. Sýretshi Pol Gogenniń «Arlestegi túngi kafe» kartınasy týraly áńgime órbitkenimizde, munda dosy Van Gogtyń da izi jatqanyn aıtqanbyz. Vokzal kafesi – jalǵyzdyq kafesi. Jetim kóńilin jetelep kelgen, armanynan adasqan jolaýshylardyń mekeni. Taǵy da jalǵyzdyq boıaýy, endi Vınsent Van Gogtyń kózimen.
Qalyby men qaǵıdasy bólek qylqalam sheberi «Túngi kafe» kartınasyn 1888 jyly qyrkúıekte jazǵan. Dál osy kúni. Úsh tún boıy Fransııanyń ońtústigindegi Arles qalasyndaǵy vokzal kafesine baryp, túngi kelýshilerdiń ýaqytyn maqsatsyz iship ótkizetinine kózi jetedi. Arpalysqa toly ómirmen sharýasy joq beıqam adamdardyń bolmysy sýretshiniń kelesi bir týyndysynyń taqyrybyna aınalady.
Keneptegi syzyqtardyń bulyńǵyrlanýy, tústerdiń uqypsyzdyǵy, keıipkerleriniń kómeski júzderi avtordyń oıyna eshteńe kirip shyqpaıtyn ospadar adamnyń jaǵdaıyn jetkizgisi keletinin málimdep turǵandaı.
Bólmeniń ıntereri sýretshiniń depressııalyq kúıin kórsetetin bir-birine qarama-qarsy nıýanstarǵa toly. Tóbedegi jasyl tús qyzyl qabyrǵalardyń mazasyzdyǵynan kúsheıgen avtordyń kúnnen-kúnge meńdep bara jatqan syrqatyn kóbirek eske túsiredi. Al qalyń da juqa sary reńkter mekemeniń kóńildi jáne tútindi atmosferasyn aıshyqtap tur. Qalǵan bılıard ústeli, kóptegen bótelke men ábeqońyr ústeldegi bos qumyralar odan ári maǵynasyzdyqty hám bostyqty baıandaıdy.
Qoıý qara túnniń mazasyn alǵan kafe, tún ortasy bolsa da uıqysy qashqan adamdar, terezedegi túngi peızaj, beımaza saǵat, erteńi kúńgirt erli-zaıyptylar bári de bir núktege baılanǵan.
Aldyndaǵy sharabyn taýysa almaı uıqyǵa ketken maskúnem men ishimdikke sylqııa toıǵan eki suhbattasýshy jaǵymsyz áserdi odan ári kúsheıtedi. Bul effektini sary kostıýmdegi kelýshi aıaqtaıdy, ol sýretshi men oqyrmanǵa týra qarap tur. Ol maǵynasyzdyqty Van Gogtan izdeıtindeı.
Sýretshi aǵasy Teoǵa jazǵan hatynda bul kartınada adamnyń ózin ózi tuńǵıyqqa batyrǵanyn jáne qurdymǵa tartqan qumarlyqty jetkizýge tyrysqanyn aıtady. Bul sát ony esinen aljastyratynyna ári qylmys jasaýǵa ıtermeleıtinin jetkizedi.
Bul sýret synshylar tarapynan joǵary baǵalanyp, Van Gogtyń ǵajaıyp týyndylarynyń biri de biregeıi esebinde tarıhqa endi. Keıinnen ol jańa stıl, ıakı ekspressıonızmdi dúnıege ákeldi. Sýretshi atalǵan shyǵarmasyn akvarelmen qaıtalaıdy.
Búginde «Túngi kafe» kartınasy Iel ýnıversıtetiniń kórkem galereıasynda saqtaýly.