Keshe Ortalyq kommýnıkasııalar qyzmetinde Ulttyq kásipkerler palatasynyń basqarma tóraǵasy Abylaı Myrzahmetov brıfıng ótkizdi. Ol Memleket basshysynyń «Qazaqstan joly – 2050: bir maqsat, bir múdde, bir bolashaq» atty Joldaýyna oraı kásipkerler palatasynyń 2014 jylǵa arnalǵan mindetteri jóninde áńgimeledi.
Elbasy Joldaýynda memleket jumysynyń negizgi bóligi Qazaqstan bıznesin, ásirese, shaǵyn jáne orta kásipkerlikti damytýǵa barynsha qolaıly jaǵdaı jasaý bolatynyn aıryqsha atap ótti. Sóıtip, Úkimetke Ulttyq kásipkerler palatasymen birlesip, jumysyn jańa bastaǵan bıznesmenderge ádistemelik kómektiń tıimdi tetikterin jasaýdy tapsyrdy, dep bastady sózin A.Myrzahmetov. Memleket basshysynyń osy tapsyrmasyna oraı atqarylyp jatqan sharýalardy saralaǵan palata tóraǵasy, bıznespen shuǵyldanamyn degen adamǵa ádistemelik kómekpen qatar, qarjylaı demeý sharalarynyń túrli tıimdi mehanızmderi qarastyrylyp jatqanyn alǵa tartty.
Ulttyq palata shaǵyn jáne orta bıznesti damytý men qoldaýda týyndap otyrǵan máselelerdi túpkilikti sheshýge bel býypty. Tóraǵanyń aıtýyna qaraǵanda, shaǵyn jáne orta kásipkerliktiń ıin kóterip, erkin damyp ketýine kedergi bolyp otyrǵan kólemdi problemalar toptamasy bar kórinedi. Birinshiden, ákimshilik kedergiler. Osyǵan baılanysty Ulttyq palata birqatar kúrdeli máselelerge júıeli taldaý jasap, olardyń tıimdi sheshimin tabýǵa múmkindik beretin tásilder tizilimin qurý jumysymen aınalysyp jatyr eken.
Máseleniń sheshimin tabatyn tásilder tizilimi qurylyp bolǵan soń, kásipkerlerdiń jeke problemalaryna taldaý jasaı otyryp, normatıvtik jáne zańnamalyq bazada ózgertýlerdi talap etetin naqty sharalardy anyqtamaq. Sóıtip, bıznestiń erkin tynystaýyna jol ashpaq. Munymen qatar, A.Myrzahmetov kásipkerlerdiń bızneske salatyn qarajatqa qoljetimdiligi máselesine de aıryqsha toqtaldy. Qajetti qarajatty alý men ony tıimdi paıdalaný úshin ár oblys, aýdan ortalyqtarynda keńes beretin ortalyqtar jumys isteı bastaıtynyn tilge tıek etti. Ol Úkimet usynyp otyrǵan tabysty kásipkerler týraly rolıkter aınaldyrý sharasyn tolyq qoldamaıtynyn bildirdi. Onyń oıynsha, aýyldy jerdegi qarapaıym adamdarǵa teledıdarda aınaldyrylǵan rolıkter qatty áser ete qoımaıdy. Sondyqtan aýdan ortalyqtarynda bıznesin ashyp, ony damytýǵa arnalǵan keńes-semınarlardy jıi uıymdastyryp, ár qalaýshyny kásipke qolynan jetelegendeı etip alyp kelgen áldeqaıda tıimdi eken.
О́ńirlik palatalardyń qyzmetine suranys bar kórinedi. Ásirese, óńirlik kásipkerlerdiń quqyǵyn qorǵaý isine suranys kóp túse bastaǵan. Osyǵan deıin kásipkerlerdiń túıtkildi máselelerine arnalǵan úsh birdeı otyrys ótkizilipti. Dál qazirgi ýaqytta kásipkerlerdiń quqyn qorǵaý jónindegi keńes jumys istep tur. Bul keńes qurylǵaly beri bıznesmenderden 70 ótinish-hat kelip túsipti. Bularmen birge, Ulttyq palata bıznesmenderdi qosymsha oqytyp, bilim-biligin arttyrýdy qarastyratyn ınternet arqyly bilim berý júıesin iske qosýdy josparlap otyr eken. «Elbasy aıtqandaı, shaǵyn bıznestiń orta kásipkerlikke kóshýine yqpal jasaýda ınternettik oqytý júıesi óte mańyzdy dep oılaımyz. Bul jerde aqparattanýdy, quzyrettilikti, jalpy bilim deńgeıin arttyrý eń basty faktor bolyp tabylady», dedi tóraǵa.
Elimizdiń jekelegen óńirlerindegi eselep ósip jatqan tarıfter de A.Myrzahmetovtiń nazarynda eken. Onyń sózine sensek, Aqtóbe jáne Oralda tarıf ósimderi shaǵyn jáne orta bıznestiń eńse kóterýine mursha bermeı tur. Ulttyq kásipkerler palatasy bul máseleni ejikteı kelip, aldaǵy naýryz aıynda Úkimetke atalǵan problemalardy sheshý týraly arnaıy usynys jasaýdy josparlap otyr. Sondaı-aq, aýylsharýashylyq ónimderin óndirýshi aýyl kásipkerlerine kepilzat jetispeýshiliginiń máselesi de palata nazarynda ekenin jetkizdi.
Brıfıngtiń ekinshi bóliminde jýrnalısterdiń birneshe suraqtaryna tolymdy jaýap qaıtarǵan A.Myrzahmetov Memleket basshysynyń tapsyrmasy boıynsha Qazaqstan bıznesi eldegi árbir otbasyǵa kirip, erkin damýy úshin, kásipkerlerdi qoldap, qorǵaý qajettigin qadap aıtty.
Nurbaı ELMURATOV,
«Egemen Qazaqstan».