Oblys ákimi Qanat Bozymbaevtyń tóraǵalyq etýimen ótken apparattyq keńeste negizinen oblystaǵy basqarý qurylymy men 2014 jyly oblys bıýdjetine engiziletin ózgerister qaraldy. Bul másele oblystyq máslıhattyń sessııasynda qaralyp, talqylanǵan bolatyn. Sóıtip, oblys ákiminiń orynbasarlary mindetterine ózgerister engizildi, birneshe basqarmalar qysqartyldy. Jıynda oblys bıýdjetine ózgerister engizilýine oraı qalalar men aýdan ákimderine bıýdjetti qaıta qaraý, óńirdiń áleýmettik-ekonomıkalyq damýyna paıdasy az tıimsiz shyǵystardy ońtaılandyrý týraly tapsyrma berildi. Sondyqtan, qaıta qaralatyn qarajatty, birinshi kezekte, basymdyq mańyzy zor oblys turǵyndarynyń múddesine qatysty máselelerdi sheshýge jumsańyzdar. Negizgi tirek ınfraqurylymdy damytýǵa aýyz sý men joldardy jóndeýge, sondaı-aq, densaýlyq saqtaý jáne bilim salasyn jaqsartýǵa jasalsyn, dedi Qanat Bozymbaev.
Mysaly, ótken jyldyń bıýdjetin ıgerý qorytyndysy oblysta 98,4 paıyzdy qurap otyr. Al, ıgerilmeı qalǵany 2 mlrd. 318 mıllıon 500 myń teńge. Úkimet sizder suraǵan qarajatty beredi. Keıin sizder bergen qarajattan bas tartasyzdar. Nege? Sebebi, sizder bıýdjet qarajatynyń qajettiligin dáleldep qorǵaı almaısyzdar, dedi oblys ákimi Qanat Bozymbaev. Aıtsa aıtqandaı, sóıtip, «ári tart, beri tartpen» júrgende eki ortada qyrýar qarjy ıgerilmeı qalady.
Farıda BYQAI,
«Egemen Qazaqstan».
Pavlodar oblysy.