Paıdalanylmaı jatyp qırady

О́tken jyldyń aıaǵynda Kaz­talov aýdandyq Mádenıet úıi men osy aýdanǵa qarasty Jal­­paq­tal aýylyndaǵy máde­nıet úıiniń esikteri kúrdeli jón­deý­ler júrgizilgennen keıin qaıta ashylǵan edi. Munyń alǵash­qysyna respýblıkalyq bıýdjetten 75 mln. 948 myń teńge, ekinshisine 77 mln. teńge bólingen. Árıne uqypty, tıim­di túrde paıdalana bilse az qa­rajat emes. Mádenıet úıleriniń qaıta ashylýyna baılanysty ót­kizilgen saltanatty sharalar, oǵan oblys ákiminiń orynbasary Baqtııar Mákenniń qatysqany jer­gilikti BAQ-ta keńinen kór­setildi. «Jaqsyny kórmek úshin» degendeı, Kaztalov aýdany or­ta­ly­ǵyndaǵy kúrdeli jóndeýden ótkizilgen Mádenıet úıin tama­sha­laýdyń sáti bıylǵy jyl­dyń 3 aqpany kúni tústi. Dál osy kúni atalǵan Máde­nıet úıinde Kaztalov aýda­ny­nyń ákimi Nurlan Bekqaıyr tur­ǵyndar aldynda esep berdi. Zalǵa qyzǵylt tústi jańa oryndyqtar qoıylypty. Ortańǵy qatarlar­dyń birinde otyrǵanbyz. Bir kez­de aldymyzdaǵy ardagerler ornalasqan oryndyqtar biri­nen soń biri synyp, beldik aǵash­tary qırap túse bastady. Olar janbas­taryn syndyryp almaǵanymen zaldaǵy lyq toly halyqtyń aldynda ájeptáýir qolaısyzdyqqa ushyrady. Osynyń aldynda aýyl tur­ǵyndary tarapynan aıtylǵan kúrdeli jóndeýdiń múldem sapasyz júrgizilgeni, onyń kóz­ge aıqyn kórinip turǵany Má­denıet úıine qoıylǵan keıbir buıymdardyń paıdalanylmaı jatyp synǵany men búlingeni jónindegi áttegen-aı degizetindeı áńgimelerdi estigen bolatynbyz. Alaıda, buǵan onsha mán bermegen edik. Endi tup-týra kóz aldymyzdaǵy joǵarydaǵydaı kórinisterden keıin oǵan senýge, ılanýǵa týra keldi. Buǵan ne deýge bolady? Paı­­dalanylmaı jatyp qı­raı bas­taǵan sapasyz oryn­dyq­tar­dyń óteýin kim tólemek? Osyn­daıda jelge ushqan esil memleket qa­rajaty-aı, dep qynjylmasqa amalyń qalmaıdy. Iá, ómir bir orynda tur­maı­dy. Aldaǵy kezde de talaı kúr­deli jóndeýler ótkiziler. Ten­der­ler oınalar. Sol kezde mem­leket qarajatynyń tekke rásýa bolmaǵanyna, istiń sapaly júr­zilgenine ne jetsin? Temir QUSAIYN, «Egemen Qazaqstan». Batys Qazaqstan oblysy, Kaztalov aýdany.