Nıý-Iorkte BUU janyndaǵy Qazaqstan Respýblıkasy men Salvador Respýblıkasynyń Turaqty ókilderi Qaırat Ábdirahmanov pen Karlos Enrıke Garsııa Gonzales Qazaqstan Respýblıkasy men Salvador Respýblıkasy arasynda dıplomatııalyq qatynastar ornatý jónindegi Birlesken kommıýnıkege qol qoıdy.
Salvador – Tynyq muhıttyń jaǵalaýynda ornalasqan, Ortalyq Amerıkadaǵy aýmaǵy boıynsha shaǵyn, halqynyń sany kóp memleket. Onyń ekonomıkasynyń negizin kofeniń, qant quraǵynyń, tamaq jáne teńiz ónimderiniń eksporty quraıdy. Salvador BUU-nyń Dúnıejúzilik saýda uıymynyń, sondaı-aq, basqa da halyqaralyq jáne óńirlik uıymdardyń múshesi bolyp tabylady.
Qazaqstannyń Syrtqy ister mınıstrligi eldiń syrtqy saıasatyn ártaraptandyrý boıynsha jumysyn jalǵastyrýda. Jańa basymdyqtardyń biri Latyn Amerıkasy men Karıb basseıni óńiri bolyp otyr. Halqynyń sany 600 mln.-ǵa jýyq jáne IJО́-si 4,5 trln. dollardy quraıtyn óńir halyqaralyq saıasat jáne ekonomıkalyq qarym-qatynas júıesinde mańyzdy ról atqarady.
2013 jyly Qazaqstan Syrtqy ister mınıstri Erlan Ydyrysovtyń Chılıge, Argentına men Brazılııaǵa alǵashqy sapary bolyp, onyń barysynda osy elderdiń Qazaqstanmen áriptestigine, sondaı-aq, BUU sheńberindegi, jahandyq problematıka máseleleri boıynsha saýda-ekonomıkalyq jáne gýmanıtarlyq yntymaqtastyqty damytýǵa múddeliligi anyqtalǵan edi.
Bastalǵan únqosýlardyń alǵashqy nátıjeleri jaman emes. Ońtústik Amerıkanyń birqatar elderimen vızalyq rejimniń jeńildetilýine jáne joıylýyna qol jetkizildi.
О́tken jyly Qazaqstan men Latyn Amerıkasy jáne Karıb basseınine jatatyn úsh iri ekonomıkamen taýar aınalymy jarty mıllıard AQSh dollaryn qurady.
Búginde Qazaqstan Latyn Amerıkasy men Karıb basseıniniń 9 elimen dıplomatııalyq qarym-qatynas ornatsa, óńirdegi 33 eldiń 31-imen dıplomatııalyq baılanysy bar.
«Egemen-aqparat».