Qaı sala úshin de mańyzy zor

Armanymyzdyń asqary, baqytymyzdyń bastaýy bolǵan Táýelsiz elimizdiń tiregi – tatýlyq, birlik, ózara kelisim. Biz – «birlik bar jerde tirlik bar» degen tekti babalardyń ulaǵatyn sanaǵa sińirgen urpaqpyz. Elbasynyń dástúrli Joldaýynda aıtylǵan negizgi oı, ortaq ıdeıa osyǵan saıady.

Joldaý jáne birlik

Máńgilik El ıdeıasynyń astary­na úńilsek, ol bizdiń dástúrimiz, ádebıe­timiz ben mádenıetimizdiń qaıta túlep, jań­ǵyrýy, dinimiz ben tilimizdiń órkendeýi. Prezıdentimiz barsha qazaqstandyqtardy osynaý ıgi isti, ortaq maqsatty jurt bolyp jumylyp júzege asyrýǵa úndedi. Shyn máninde, Máńgilik El ıdeıasy – tereńnen tolǵanyp, áriden oıla­nyp qabyldanǵan sheshim. Nursul­tan Nazarbaevtyń bıylǵy Jol­daýy halqymyzǵa qanat bitirip, jastary­myzdyń jigerin oıatty. Elbasy bizdiń baǵ­darymyz – birlik ekenin osy Joldaýda taǵy da shegelep aıtty. Islam dini adam­dar arasynda alaýyzdyqqa jol ber­meıdi. Bizdiń árbir jetistigimiz Allanyń qalaýymen Táýelsizdigimizdiń arqasynda júzege asýda. Bul – bizdiń birligimizdiń jemisi.

Joldaý jáne qaıyrymdylyq

Paıǵambarymyz Muhammed (s.ǵ.s.) úmbetine osy ómirdi rýhanı qun­dylyqtardy baıytýǵa, adamdar arasynda meıirimdilikti jaıýǵa, keshirim jolyn ustanyp, ǵumyrymyzdy izgilikke arnaýdy ósıet etken. Elbasy bir sózinde múgedekterdi jumyspen qamtý máselesin aıtyp ótti. Osy baǵytta meshit ımamdary qaıyrymdylyq sharalaryn uıymdastyryp keledi. Dinı basqarma 2014 jyly úsh baǵyt boıynsha jumystarǵa basymdyq bermek. Birinshi – birligimizge syna túsirip, búlik shyǵaryp júrgen dinı aǵymdardyń áreketine tosqaýyl qoıý. Ekinshi – ýaǵyz-nasıhat jumysyn jandandyrý. Úshinshi – qaıyrymdylyq is-sharalardy uıymdastyrý. 2014 jyly barlyq meshitterde qaıy­rymdylyq aksııalary uıymdas­tyrylady.

 Joldaý jáne salamatty ómir

 Barshańyzǵa belgili, Elbasy Nursultan Ábishuly Nazarbaev bıylǵy dástúrli Joldaýyn «Bir maqsat, bir múdde, bir bolashaq» dep atady. Halqymyzdy birlik pen yntymaqqa, ózara túsinistik pen kelisimge, patrıotızm men bilim alýǵa úndegen Joldaýda birqatar máseleler kóterildi. Joldaý – baǵdarlamalyq qujat. Sondyqtan onda aıtylǵan árbir sózdiń máni men mazmuny tereń. Al Joldaýǵa qoldaý bildirip, ony oryndaý – barshaǵa ortaq ıgi is. Prezıdentimiz 90 mınýt baıandaǵan Joldaýdyń salamatty ómir saltyn qa­lyp­tastyrýǵa qatysty aıtylǵan basta­malarǵa toqtalýdy jón kórip otyrmyn. Elbasy bıylǵy Joldaýda: «Sala­mat­ty ómir saltynyń ornyǵýy, medısınanyń damýy qazaqstandyqtardyń ómir súrý uzaqtyǵyn 80 jasqa deıin arttyrady. Qazaqstan medısınalyq týrızmniń jetekshi eýrazııalyq ortalyqtarynyń birine aınalady. Ozyq jáne básekege qabiletti ulttyq bilim berý júıesin qurý aıaqtalady», dep atap ótti. Iá, Elbasy jastarǵa árdaıym sportpen shuǵyldanýdy nasıhattap keledi. Ol úshin eń aldymen ózi úlgi bolyp, shańǵy tebý men tennıs oınaýdyń qyr-syryn suhbattarynda jıi sóz etedi. 1 jeltoqsan – Tuńǵysh Prezıdent kúninde otandyq telearnalardan Elbasy jaıly kórkem fılm kórsetildi. Elbasy jaıly túsirilgen fılmde Prezıdentimizdiń sportty ózine serik etip, salamatty ómir saltyn qalyptastyrýǵa eń aldymen ózi bas­tamashyl bolǵany barshaǵa aıan. Nursultan Nazarbaevtyń jumys kestesi onyń sportpen shuǵyldanýymen bastalatyny kórkem fılm­de jarııa etildi. Prezıdent bir suhbatynda: «Sport adam­ǵa sergektik syılaıdy. Sergek adam ju­mysty óndirip isteıdi», degen bolatyn. Paıǵambarymyz Muhammed (s.ǵ.s.) óz úmbetine, ıaǵnı siz ben bizge sýǵa júzýdi, atpen serýendeýdi, kúresýdi, sadaq atýdy nasıhattaǵan. Alla Elshisi (s.ǵ.s.) bir hadısinde: «Álsiz musylmannan kúsh­ti musylman qaıyrly. Biraq ekeýin­de de qaıyr bar», degen. Hadısten túsin­genimizdeı, kúshti musylman árqashan sergektik qasıetimen qoǵamǵa oń áseri men jaqsy isterge úlesin kóbirek qosa alady.

 Joldaý jáne otbasy qundylyǵy

 Prezıdentimiz bıylǵy Joldaýynda otbasy qundylyqtaryn, adamdar arasyndaǵy meıirim men súıispenshilikti erekshe atap ótti. «Otan – otbasynan bastalady», degen ulaǵatty uǵym bar. Otbasynda tynyshtyq pen tatýlyq saqtalsa, onda Otanymyz kórkeıip, izgi nıetimizge jetemiz. Otbasy – otaǵasyna amanat. Paıǵambarymyzdyń (s.ǵ.s.) hadı­­­sinde árbir adam óz ortasyna, otba­syna jaýapty ekenin aıtqan. Al qa­­sıetti kitabymyz – Quranda: «Sen­der­­ge, oǵan turaqtaýlaryń úshin óz jynys­­taryńnan jubaılar jaratyp, aralary­ńa súıispenshilik, meıirimdilik paıda qyl­ǵan­dyǵy da Onyń belgilerinen. Sóz joq, osylarda oılanǵan elge belgiler bar» (Rum súresi, 21-aıat), dep baıandalǵan. Islam dini otbasynda, qoǵamda, memlekette birlik pen yntymaq ornatýǵa úndeıdi.

Joldaý jáne sport

 Elbasy Joldaýyna mán beretin taǵy bir jaıt: ol – sportpen shuǵyldaný, durys tamaqtaný. Prezıdent bylaı dedi: «Densaýlyq saqtaý salasyndaǵy basty basymdyq – alǵashqy medısınalyq-sanıtarlyq kómekti damytý. Mindetti medısınalyq saqtandyrý engizý máselesin zerttegen jón. Memlekettiń, jumys berýshilerdiń jáne qyzmetkerdiń densaýlyq úshin ortaq jaýapkershiligi – medısınalyq qyzmettiń barlyq júıesiniń basty qaǵıdaty. Sportpen shuǵyldaný, durys tamaqtana bilý, júıeli profılaktıkalyq tekserilý – aýrýdyń aldyn alýdyń negizi». Jýyrda Dinı basqarma men Almaty qalasy Ortalyq meshiti ókil ımamdar arasynda fýtboldan joldastyq kezdesý ótkizdi. Mundaǵy maqsat – dindarlar arasynda sportty nasıhattaý, salamatty ómir saltyn qalyptastyrý. Osyndaı is-sharalar aldaǵy ýaqytta da jıi uıymdastyryla beredi degen senimdemiz. Barsha adam balasy jalǵyz Jara­týshynyń bar ekenin moıyndaıdy jáne Odan asqan Qudiret ıesi joqtyǵyna kúmán keltirmeıdi. Bárimizge jer, dúnıe, aspan, ǵalamshar ortaq. Endeshe, qysqa ómirde arazdasyp emes, ardaqtasyp, dushpandasyp emes, dostasyp, bereke men birlikte ǵumyr keshkenimiz abzal. О́ıtkeni, ımandylyq saltanat qurǵan qoǵamda azǵyndyq pen arsyzdyqtyń qaısy túrine de oryn qalmasy anyq. Jaratýshy Iemiz barshamyzdy jaq­sy­lyqta, saýapty isterde, el ıgiligi jolyn­daǵy jumystarda, berekeli basqosýlarda jo­lyqtyrǵaı! Ámın! Erjan qajy MALǴAJYULY, Qazaqstan musylmandary dinı basqarmasynyń tóraǵasy, Bas múftı.