Sport – biriktirýshi kúsh

Keshe Reseıdiń Sochı qalasynda XXII Qysqy Olımpııa oıyndarynyń alaýy tutandy. Sóıtip, kezekti Aq Olımpıadanyń doda-dýmany bastalyp ketti. Qazaqstandyq sportshylarǵa jarys jolynda tek tabys tileımiz!   Keshe tús áletinde Elbasy Nursultan Nazarbaev XXII Qysqy Olımpııa oıyndarynyń ashylý saltanatyna qatysý úshin Sochı qalasyna ushyp keldi. Memleket basshysy Adlerdegi halyqaralyq áýejaıǵa taban tiregen boıda birden Qazaqstan Ulttyq olımpııalyq komıtettiń qonaq qabyldaý úıine baǵyt túzedi. Munda Elbasy ózin kútip turǵan olımpııalyq qurama komanda múshelerimen kezdesti. Kezdesý barysynda Nursul­tan Nazarbaev Sochıdegi Olım­pıadanyń buǵan deıingi bar­lyq Oıyndarǵa qaraǵanda, res­pýblıkamyzǵa geografııalyq jaǵynan eń jaqyn turǵanyn atap kórsetti. О́ziniń olımpııalyq qurama múshelerine arnaǵan só­zinde Prezıdent sporttyń bi­riktirýshi kúsh ekenine toqtaldy. – Sizderdiń árqaısylary­ńyz­dyń olımpıada lısenzııa­syn jeńip alýlaryńyzdyń ózi­ – sporttyq jol­daǵy úl­ken jetistik. Biz London Olım­pıa­dasynan keıin sporttyq je­tis­tik­terimizdiń deńgeıin joǵary kótergen edik, men endi sizderge de sondaı jańa jeńister ti­leımin. Búginde memleketimiz sizderdiń halyqaralyq arenada zor jetistikterge jetýlerińiz úshin barlyq jaǵdaıdy jasap otyr. Meniń tapsyrmam boıynsha qajetti barlyq qarajat bólinip, sport ǵımarattary salynyp jatyr, sizderdi eń úzdik otandyq jáne sheteldik jattyqtyrýshylar jattyqtyrady. О́z basym sizderge árdaıym qoldaý kórsetemin jáne barsha jetistikterińizdi udaıy qadaǵalap otyramyn, – dedi Memleket basshysy. Nursultan Nazarbaev gazetter men televıdenıeniń arqa­synda qazaqstandyqtar olım­pıa­dashylardyń árqaısysyn bi­letinin jáne olarǵa búkil elimiz shynaıy jankúıer bolatynyn aıtty. – Qazaqstandyq jankúıerler Olımpııa oıyndaryn birinshi ret jańadan ashylǵan «KAZSport» arnasynan kóredi. Sizder úshin mıllıondaǵan otandastary­myz jankúıerlik etip, ózderi­ńiz­den joǵary nátıjeler kú­tedi. Biz Sochıdegi basty saıys­qa olımpıadashylar men jat­tyq­tyrýshylardyń barlyǵy jaqsy daıyndalǵanyn bilemiz, – dedi Qazaqstan Prezıdenti. Memleket basshysy, sondaı-aq, 2022 jylǵy Qysqy Olımpııa oıyndaryn ótkizýge Almatynyń kandıdatýrasy usynylǵanyn, elimizde zamanaýı sporttyq ınfraqurylymdardyń, jarys­tardy eń joǵary deńgeıde ótkizý tájirıbesi bar ekenin atap ótti. Kezdesý sońynda olımpıada­lyq komanda músheleri ózderine udaıy kóńil bólip, qoldaıtyny úshin Memleket basshysyna rızashylyqtaryn bildirip, estelik kádesyı tapsyrdy. Al Prezıdent óz kezeginde sportshylarǵa densaýlyq, kúsh-jiger jáne olımpıadalyq aq jol tiledi. Memleket basshysy, sondaı-aq, qonaq qabyldaý úıindegi kezdesý barysynda «Astana Ekspo-2017» UK» aksıonerlik qoǵamy basqarmasynyń tór­aǵa­sy Talǵat Ermegııaevtiń As­tanada dúnıejúzilik kórmeni ótkizý jónindegi josparlary jáne Almaty qalasynyń ákimi Ahmetjan Esimovtiń 2022 jylǵy Qysqy Olımpııa oıyndaryn ótkizýge Almaty qalasy ótinimin daıyndaý barysy týraly esepterin tyńdady. Budan keıin Nursultan ­Na­zarbaev «Rossııa» telearnasy­nyń jýrnalısi Sergeı Brılevke suhbat berdi. Qazaqstan Ulttyq o­lımpııalyq komıtetiniń qo­naq qabyldaý úıinde ótken áńgi­melesý barysynda Prezıdent Sochıdegi Qysqy Olımpıadaǵa daıyndyq kezinde orasan jumys júrgizilgenin, sonyń arqasynda qala aıryqsha jańaryp, joǵary deńgeıdegi kýrorttyq aımaqqa aınalǵanyn atap ótti. Memleket basshysy, sondaı-aq, aýqymdy ınfraqurylymdyq jobalardy iske asyrý, sonyń ishinde Qazaqstannyń astanasyn salý da árdaıym birqatar synǵa ushyraǵanyn, biraq nátıjesinde osynyń bári qarapaıym azamattar úshin qolaılylyq pen jaılylyqty arttyrýǵa ákeletinin tilge tıek etti. Qazaqstan Prezıdenti Alma­tyda Qysqy Ýnıversıada ótkizý daıyndyǵynyń josparlary men 2022 jylǵy Qysqy Olımpıadany ótkizýge ótinimdi daıarlaý barysy jaıyndaǵy oılaryn da ortaǵa saldy. Sońynda Nursultan Nazarbaev Reseıdiń Qysqy Olımpııa oıyndaryn tabysty ótkizýine tilektestik bildirip, bul kezeńde álemdegi qaqtyǵystar men shıelenister deńgeıi edáýir báseńdeıtinine úmit artty. Serik PIRNAZAR, «Egemen Qazaqstan» –  Sochıden. Sýretterdi túsirgender S.BONDARENKO, B.OTARBAEV.