Keshe Bas prokýratýrada brıfıng ótkizilip, onda budan buryn habarlanǵandaı, quqyq qorǵaý organdary Sentr Kredıt Bank, Kaspıı Bank jáne Alıans Banktiń bankrot aldyndaǵy jaǵdaıy jóninde jalǵan aqparat taratqan adamdardy anyqtaý boıynsha jedel-izdestirýdiń keshendi sharalary júrgizilip jatqandyǵy týraly resmı ókil Nurdáýlet Súıindikov aıtyp berdi.
Mundaı jalǵan aqparattyń atalǵan qarjy uıymdaryna aıtarlyqtaı zııan keltirip, qoǵamda áleýmettik shıelenistiń órshýine ákep soqqany belgili, dedi resmı ókil. Búgingi kúnge deıin bankterdiń qarjylyq ahýaly jóninde jalǵan aqparattyń alǵash taratylýyna qatysy bar birneshe adam anyqtalyp, ustaldy. Olar kinálaryn moıyndap, tıisti túrde jaýap berýde jáne mundaı áreketterge barýlarynyń jaı-japsaryn egjeı-tegjeıli baıandap berdi. Ustalǵandardyń arasynda almatylyq zań kompanııalary biriniń qyzmetkeri jáne bank zańgeri bar. Olardyń jaýaptary basqa anyqtalǵan jáne ustalǵan adamdardyń túsiniktemeleri sııaqty muqııat tekserilýde.
Jalpy alǵanda, quqyq qorǵaý organdary anyqtaǵan kórineý jalǵan aqparatty daıyndaý jáne taratýǵa kináli barlyq adamdardy áshkereleý jáne jaýapkershilikke tartý jóninde sharalar qabyldaýda. Istiń naqty mán-jaılaryna qaraı ákimshilik jáne qylmystyq jaýapkershilik týraly másele sheshiletin bolady. Zardap shekken bankter materıaldyq zııandy óteý týraly talap-aryzdar berýdi bastady. Sonymen qatar, biz Parlamentke eleýli zııan jáne aýyr saldarlarǵa ákelýi múmkin kórineý jalǵan aqparatty taratý úshin qylmystyq jaýapkershilikti kúsheıtý jóninde usynystar engizdik. Osyǵan baılanysty Bas prokýratýra azamattarǵa, BAQ ókilderine shyndyqqa sáıkes kelmeıtin aqparatty taratýdan bas tarta otyryp, osy máselelerge neǵurlym jaýapkershilikpen qaraý týraly ótinish jasaıdy. Júrgizilip jatqan jumystyń barysy men nátıjeleri týraly qosymsha habarlanatyn bolady, dedi Bas prokýratýranyń resmı ókili.
Aleksandr TASBOLATOV,
«Egemen Qazaqstan».