Eldiktiń isi – erlerdiń úlesi

Taraz qalasynda ótken «Máńgilik El» patrıottyq aksııasyna eki myń adam qatysty Qazaq eli  ulttyq bolmysymen erek, rýhanı qazynasymen baı, halqynyń birligimen qýatty, Astanasymen asqaq, egemendigimen eńseli. Mine, osyndaı qasterli qundylyqtardy «Máńgilik El»  ıdeıasy kemel keleshekpen astastyra tústi. Elbasy Nursultan Nazar­baevtyń  bıylǵy Joldaýynan bas­taý alǵan  bul uly ıdeıa Jambyl óńirinde keńinen qoldaý taýyp, túrli ıgi bastamalarǵa uıytqy bolyp otyr. Oblys  ákimi Kárim Kókirekbaevtyń qatysýymen ob­lys ortalyǵynda dúrkirep ót­ken keń kólemdi «Máńgilik El» pat­rıottyq aksııasy sonyń bir dáleli. Aksııaǵa 2 myń adam qatysty. О́ńirden ósip-óngen zııaly qaýym, etnomádenı birlestikter ókilderi jáne rýhy bıik ulandar elimizdi ulyqtaıtyn uly baǵdar – «Máńgilik El» ıdeıasyn kóńilderge qanat bitiretin án-jyrlarymen, myń buralǵan bılerimen, kúmbirlegen kúılerimen barynsha pash etýge atsalysty. Biz, tipti, «Taraz-Arena» keshenindegi aksııany tamashalaýǵa aǵylǵan qarapaıym halyqtyń nurly júzderinen de uly eldikke degen ińkárliktiń izgi sezimderin baıqadyq. Qazaq eliniń bir pushpaǵy, tarıhy tereń Taraz – Áýlıeata – Jambyl óńiri qashanda baq-berekeniń bastaýy, yrys pen yntymaqtyń altyn besigi bolǵan. Kemel oıly handarymyz Kereı men Jánibek Qazaq eliniń týyn alǵash ret kótergen ólkeden hal­qymyzdyń maqtanyshy bolǵan Turar Rysqulov, Baýyrjan Momyshuly, Sherhan Murtaza, Shona Smahanuly jáne Qaırat Rysqulbekov sııaqty kóptegen qaısar rýhty tulǵalary túlep ushty. Olar Keńes Odaǵyna bodan bolǵan kezdiń ózinde týǵan el, týǵan jer jáne týǵan til týrasynda eren erlik kórsetip, búgingi jastar boıyndaǵy patrıottyq  rýhty janıtyn qaıraqqa aınaldy. Demek, ór rýhty azamattardyń ónegeli isi táýelsiz elde ósip kele jatqan salamatty urpaqpen óz sabaqtastyǵyn taýyp, keń qanat jaıýy zańdy qubylys. Patrıottyq aksııanyń maqsaty aıqyn. Ol jurtty Qazaq eliniń órkenıetti 30 eldiń qataryna enýi jolyndaǵy bastamalardy bi­limmen, ǵylymmen jáne ınnovasııalyq turǵydaǵy qarysh­ty damý arqyly qoldaýǵa shaqyrý. Sol jolda sony sekiris jasap, bas biriktirý. Sondyqtan qýatty eldegi shýaqty ómirdi pash etip, «birlik túbi – bereke» ekenin ulyqtaǵan aksııadan aldaǵy kúnderdegi alar asýlarymyzdy boljap, arqalanyp qaıttyq. Kósemáli SÁTTIBAIULY, «Egemen Qazaqstan». TARAZ.