Áıelderge qatysty kemsitýshilikti joıý jónindegi BUU komıteti genderlik teńdik salasynda Qazaqstannyń halyqaralyq mindettemelerdi oryndaǵanyn atap ótti.
Jenevada ótip jatqan Áıelderge qatysty kemsitýshilikti joıý jónindegi BUU komıtetiniń 57-sessııasy sheńberinde Qazaqstan Respýblıkasynyń Áıelderge qatysty kemsitýshiliktiń barlyq formasyn joıý jónindegi konvensııa qaǵıdalaryn iske asyrýy týraly 3 jáne 4 qurama merzimdi baıandamalardyń qorǵalýy ótti.
Qazaqstandyq delegasııa basshysy – Qazaqstan Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń tóraıymy M.Bekbosynova BUU komıteti músheleriniń nazaryna sońǵy jyldardaǵy ózgerister esebimen bizdiń elde júrgizilip jatqan genderlik saıasat týraly baıandamany usyndy.
Qazaqstan delegasııasynyń músheleri komıtet sarapshylaryn Qazaqstannyń áleýmettik-ekonomıkalyq jáne qoǵamdyq-saıası salasyndaǵy mańyzdy jáne ilgerindi ózgeristeri jóninde habardar etti. Atap aıtqanda, «Qazaqstan joly – 2050: bir maqsat, bir múdde, bir bolashaq» atty jyl saıynǵy halyqqa Joldaýynda Elbasy Qazaqstan damýynyń basymdyqtary retinde búkil álem elderi úshin eń qaýipsiz jáne jaıly meken, sondaı-aq, medısınalyq týrızmniń jetekshi eýrazııalyq ortalyǵyn qurýdy ilgeriletkeni atap ótildi. Bul, óz kezeginde, ómir súrý sapasynyń jaqsarýy men uzaqtyǵynyń artýyna, demografııalyq ósimge, bilim berý men densaýlyq saqtaý salasynda álemdik standarttarǵa jetýge, turǵyn úıdiń qoljetimdi bolýyn qamtamasyz etýge, sondaı-aq, azamattardy qylmystardan qorǵaýǵa baǵyttalǵan júıeli ózgeristerdi boljaıdy.
О́z túsiniktemelerinde komıtet músheleri genderlik teńdikti saqtaý máselesinde Qazaqstannyń edáýir ilgerilegenin atap ótti. Atap aıtqanda, májiliste tóraǵalyq etken Fransııanyń táýelsiz sarapshysy Nıkol Emelın qazaqstandyq tarap komıtettiń usynystary men eskertýlerin oryndaýǵa jaýapkershilikpen qaraǵandyǵyn málimdedi.
«Egemen-aqparat».