Ortalyq kommýnıkasııalar qyzmetinde О́ńirlik damý vıse-mınıstri Serik Jumanǵarın men «Damý» kásipkerlikti damytý qory» AQ basqarma tóraǵasynyń orynbasary Qanat Sultanǵazıev baspasóz máslıhatyn ótkizdi.
Onda Úkimettiń keńeıtilgen otyrysynda Elbasy júktegen tapsyrmalardy oryndaýǵa qatysty qabyldanǵan sharalar jóninde aıtyldy. Memleket basshysynyń tapsyrmalaryn oryndaýdyń basym baǵyttarynyń biri bızneske qatysty bolatyn. Onda О́ńirlik damý mınıstrligine ákimshilik jáne ruqsat berý rásimderin ońtaılandyrý júktelgen. Sóıtip, azamattardy kásipkerlikke yntalandyrý qajet. Bul boıynsha S.Jumanǵarın baıandama jasady. «Memleket basshysynyń tapsyrmalaryn oryndaý maqsatynda bıznes qaýymdastyqtar ókilderinen arnaıy qurylǵan saraptamalyq top bıznestiń damýyna kedergi keltiretin jeke normalardy alyp tastaý nemese ózgertý boıynsha 231 usynysty taldady. Ár usynysty múddeli memlekettik organdar talqylady. Olardyń ishinde 96 usynysty oryndaý maquldandy. Taıaý arada 8 kodekske, 55 zańǵa jáne túrli deńgeıdegi 30 zańǵa táýeldi normatıvtik-quqyqtyq aktige ózgerister engizýdi kózdeıtin tıisti qujattar ázirlenetin bolady», dedi vıse-mınıstr.
Qazirgi tańda elimizdiń qaı mekeninde de kásipkerlikpen shuǵyldanýǵa Úkimet tarapynan barlyq jaǵdaı jasalyp jatqanyn táptishtegen baıandamashy, osy ýaqytta Astana, Almaty, Semeı qalalarynda kásipkerlerge qyzmet kórsetý ortalyqtary jumys istep turǵanyn kóldeneń tartty. Ol ortalyqtar búginge deıin 22 myńnan astam qyzmet kórsetip úlgergen. Naqtylasaq, 9 myń shaǵyn jáne orta bıznes sýbektileri men áleýetti kásipkerler ortalyq qyzmetin paıdalanypty. Buıyrtsa, aldaǵy kúnde kásipkerlerdi qoldaý ortalyqtary barlyq oblys ortalyqtaryna oryn teýip, bıznespen aınalysam degen árbir azamatqa jan-jaqty qoldaý kórsetpek eken. Osy mańyzdardy nyqtaǵan S.Jumanǵarın ótken jyldyń sońyna taman Memleket basshysyna usynylǵan business.gov.kz biryńǵaı bıznes-portaly tanystyrylǵanyn tilge tıek etti. «Portalda onlaın konsýltant qyzmeti ornalastyrylǵan. Ol boıynsha bıznesmen 24 saǵat boıy kepildendirilgen túrde kez kelgen suraqtarǵa jaýap ala alady. Onda kásipkerlerdiń quqyqtary men múddelerine qatysty normatıvtik-quqyqtyq aktilerdi talqylaý múmkindigi qarastyrylǵan. Endigide kez kelgen kásipker osy qyzmetti paıdalanyp, jumys isteı alady», dedi vıse-mınıstr.
Búgingi kúni «Báıterek» holdıngi qaıta óńdeý sektoryndaǵy shaǵyn jáne orta bıznes jobalaryn nesıelendirýge «Damý» qory arqyly 200 mlrd. teńge bólýdi qarastyryp otyr, dep bastady sózin Q.Sultanǵazıev. Onyń sózine zer salsaq, qarjy ekinshi deńgeıli bankter arqyly bólinetin bolmaq. Munymen birge, bankter tarapynan jobalardy teń qarjylandyrý múmkindigi de qarastyrylyp jatyr eken. Iаǵnı qor arqyly beriletin 200 mlrd. teńgeniń ústinen bankterdiń taǵy da 200 mlrd. teńge qosymsha qarjylandyrýyn usynyp otyrǵan kórinedi. Mundaǵy eskeretin jaǵdaı – bankter tarapynan qarjy naryqtyq sharttarǵa sáıkes tartylatyn bolady.
Nurbaı ELMURATOV,
«Egemen Qazaqstan».