Respýblıkalyq aqparattyq-nasıhat tobynyń bir top músheleri Qyzyljar óńirin aralap, «Qazaqstan joly–2050: bir maqsat, bir múdde, bir bolashaq» Joldaýynan týyndaıtyn talaptardy jurtshylyqqa jetkizýdi ıgi maqsat etken.
Olardyń alǵashqy kezdesýi oblystyq ákimdiktiń úlken zalynda ótip, oǵan túrli sala ókilderi qatysty. Basqosýdy oblys ákimi Samat Eskendirov júrgizip otyrdy. Aqparattyq-nasıhat tobynyń jetekshisi, Ishki ister mınıstri Qalmuhambet Qasymov jınalǵandar aldynda sóz alyp, mańyzdy qujattyń basty qaǵıdattaryn jan-jaqty taldap berdi. Onyń ishinde quqyq qorǵaý salasyn jetildirý máselelerine, júrgizilip jatqan reformalarǵa toqtaldy. Adamdardyń tynyshtyǵyn oılaý, esh alańsyz ómir súrýin qalyptastyrý basty mindetterdiń biri bolyp tabylady, dedi.
Qazaqstan halqy Assambleıasy Tóraǵasynyń orynbasary – Hatshylyq meńgerýshisi Eraly Toǵjanov Joldaýda Máńgi El ulttyq ıdeıasy oryndy qozǵalǵanyn, egemendi damýdyń 22 jylynda jetken tabystarymyz ben jetistikterimizdiń qazynaly qundylyqtarymyzǵa qyzmet ete beretinin, halyq birligin saqtaýdan asqan baqyt joqtyǵyn tilge tıek etti.
Q.Qasymov Esil aýdany jurtshylyǵymen ótken júzdesýde tarıhı qujatta agroónerkásip keshenin ınnovasııalyq baǵytqa túsirýdiń naqty qadamdary jasalǵanyn, bul oraıda, astyqty ólke sanalatyn Qyzyljar óńiri aldynda irgeli mindetter turǵanyn áńgimeledi. Odan ári Májilis depýtattary qaraýyna berilgen Qylmystyq-atqarý kodeksiniń artyqshylyqtaryn túsindirip, onyń túpki máni qoǵamdy izgilendirý bolyp tabylatynyn jetkizdi. Jol qaýipsizdigi erejesin saqtaý el turǵyndarynyń buljymas boryshyna aınalýy tıis. Bul kórsetkish jóninen maqtana almaımyz. Tek byltyrdyń ózinde ǵana 23 myńnan astam jol-kólik oqıǵasy tirkelip, 3 myńdaı adam mert boldy. Qaıǵyly oqıǵalardyń kóbi júrgizýshilerdiń kinásinen jasalady, deı kelip, jol erejesi barynsha qatańdanatynyn qadap aıtty. Oblys ákimi S.Eskendirov et, sút ónimderin qaldyqsyz óńdeıtin salany jandandyrý qajettigine kóńil aýdardy. Joldaýdy nasıhattaýshylar «Esil» JShS-inde bolyp, kúnine 100 tonna makaron ónimderin shyǵaratyn makaron sehynyń ujymymen kezdesti.
E.Toǵjanov etnomádenı birlestikter múshelerimen júzdesse, Bilim jáne ǵylym mınıstriniń orynbasary Esenǵazy Imanǵalıev bilim oshaqtarynyń tynys-tirshiligimen tanysty.
О́mir ESQALI,
«Egemen Qazaqstan».
Soltústik Qazaqstan oblysy.