Áınektiń de áınegi bar. Qazir tehnologııanyń damyǵan zamany ǵoı. Osynaý móldir, áıbat áınekterdiń keıbiri jazda kún kózinen saqtap, qystyń kúni jylýdy syrtqa jibermeıdi eken. Bulardy, árıne, kádimgi áınekpen salystyra almaıtynyńyz anyq. Iаǵnı, bul shynylar úıge jylý, shýaq beredi.
«Dana» JShS sáýlet salasynda qoldanýǵa arnalǵan shyny túrlerin shyǵarýmen aınalysady. Olar údemeli ındýstrııalyq-ınnovasııalyq damý baǵdarlamasy aıasynda 350 mıllıon teńge qarjy alǵan. Aldaǵy naýryz aıynda kásiporyn jumysyn bastap, 130-dan astam jańa jumys ornyn ashýdy josparlap otyr. Jaqynda Ońtústik Qazaqstan oblysy ákimdiginiń qoldaýymen «Shymkent ınnovasııa» JShS men «Dana» JShS birlese otyryp, «Zamanaýı shyny óndirý, ony sáýlet qurylysynda qoldaný jáne onyń energııa únemdeýdegi múmkinshilikteri» atty taqyrypta halyqaralyq konferensııa ótkizildi. Konferensııa aıasynda kórme uıymdastyryldy. Oǵan nemis, fransýz, reseılik jáne ýkraınalyq óndiristik kompanııalardyń ókilderi qatysty.
Zamanaýı úlgide shyny óndirip qana qoımaı, ony sáýletti qurylystarǵa paıdalanýdy maqsat tutqan kórmede otandyq ónimderdiń sapasy sheteldikimen deńgeıles ekenin tutynýshylar aıtyp jatty. «Kórmege shetelden ákelip qoıǵan dúnıelerdiń barlyǵy derlik búginde Shymkentte, Almatyda shyǵarylyp jatyr. Biz de shetelde shynylarymyzben maqtana alamyz», deıdi kórmege qatysýshy Zulhaınar Qojamqulov.
Osy is-sharanyń barysynda jergilikti kásipkerler birqatar kelissózderge qol jetkizdi.
Oralhan DÁÝIT,
«Egemen Qazaqstan».
Ońtústik Qazaqstan oblysy.