Memleketimizdiń Tuńǵysh Prezıdenti – Elbasy Nursultan Nazarbaevtyń «Eldiktiń jeti tuǵyry» atty qaǵıdattar jıyntyǵyn oqyp, jyly qabyldadym. Ár tuǵyrdyń jelisin «Táýelsizdik» uǵymynan alyp órgen Elbasynyń jas urpaqqa joldaǵan úndeýi men Prezıdentimiz Qasym-Jomart Toqaevtyń «Táýelsizdik bárinen qymbat» maqalasynyń arasynan tamasha sabaqtastyqty, úılesimdi baıqadym.
Qos saıası tulǵa da Táýelsizdik tizgininiń bas ıesi jastar ekenine basymdyq bere otyryp, óz tolǵamdary arqyly bizdiń baǵyt-baǵdarymyzǵa aınymas jol siltep, kókeıimizge senim uıalatar sózderin naqty mysaldarmen dáıekteıdi. Al adam balasy úshin senimnen kúshti qudiret joq desek, bul senimniń talaı jasqa rýhanı kúsh syılaıtynyna záredeı shúbá etpeımiz. О́z maqalasynda Táýelsiz el bolý ony jarııalaýmen nemese memlekettiń irgetasyn qalaýmen shektelmeıtinin shegelep aıtqan Qasym-Jomart Kemeluly: «Táýelsizdik úshin naǵyz kúres kúndelikti eńbekpen, úzdiksiz ári dáıekti eldik saıasatpen máńgi jalǵasady. Biz qýatty táýelsiz memleketimizben ǵana ult retinde jer betinde saqtalamyz», degen bolatyn. Al urpaqtar aldyndaǵy bul uly mindet Elbasy úndeýinde: «Rýhymyzdy qaırap, eńsemizdi tiktep, budan da bıik asýlarǵa jetý úshin jáne Táýelsiz Qazaqstannyń jarqyn bolashaǵy jolynda tynbaı jumys isteýge tıispiz! Biz kez kelgen synaqtan súrinbeı ótip, jeńiske birge jetemiz», degen aıshyqty sózdermen kórinis tabady.
Oı men sózde, sóz ben iste birlik tanytyp, baıtaǵynyń berekesin arttyrý dástúrin Kereı men Jánibek handarymyzdan sińirgen el edik qoı. Endeshe, tuǵyryna qonǵan Táýelsizdik Týyn máńgi etý jolynda biz de aıanyp qalmaıyq!
Serik SEIITMAN,
Memleket tarıhy ınstıtýtynyń ǵylymı qyzmetkeri