Syr boıynda bıznesti damytýǵa memlekettik jáne óńirlik baǵdarlamalardyń barlyq múmkindigi paıdalanyldy. Bıyl 1 975 joba «Bıznestiń jol kartasy-2025», «Eńbek» memlekettik baǵdarlamalary men «Qyzylorda» óńirlik ınvestısııalyq qory arqyly 23,8 mlrd teńgege qarjylandyryldy. Byltyrmen salystyrǵanda osy jyly nesıe portfeli 6 ese ulǵaıypty.
Oblystyq kásipkerlik jáne týrızm basqarmasynyń málimetine sáıkes memlekettik baǵdarlamalar aıasyndaǵy nesıelerdiń syıaqy mólsherlemesiniń tómendeýi, memlekettik kepildikter lımıtteriniń ulǵaıýy bıznes úshin kredıt alatyndarǵa qolaıly bolyp otyr.
Budan bólek, jergilikti taýar óndirýshilerdi qarjylandyrý úshin bıyl 2 paıyzdyq nesıeleý baǵdarlamasy iske qosyldy. Buǵan oblystyq bıýdjetten «Qyzylorda» óńirlik ınvestısııalyq ortalyǵyna 400 mln teńge qaralyp, taýar óndirýshilerdiń 348 mln teńgelik 14 jobasy maquldandy.
– Keler jylǵa 2 paıyzben nesıeleý baǵdarlamasyna qaralatyn qarjy ósedi. Bıznesin jańa bastaǵandar men kásipke yntaly jumyssyzdardyń bastamalaryn qarjylandyrý da júıeli júrgizildi. Jyl basynan beri memlekettik baǵdarlamalar aıasynda 2 592 jobaǵa 1,7 mlrd teńge óteýsiz grant berildi, – deıdi oblystyq kásipkerlik jáne týrızm basqarmasynyń basshysy Ferdoýsı Qojabergenov.
Memlekettik qoldaý sharalary arqyly shaǵyn jáne orta bızneste jastar úlesin arttyrý nazardan tys qalǵan joq. On aı aıasynda 317 jas kásipker óz bıznes jobalaryn iske asyrý úshin 6 paıyzben 2,8 mlrd teńge nesıe alǵan. Jastardyń 868 startap jobasyna 715,4 mln teńge memlekettik grant bólindi.
Jalpy, búginde jastar bıznestiń túrli salalarynda kásipkerlik bastamalardy belsendi túrde júzege asyrýda. Osy arqyly aımaqtan shyǵatyn túrli taýarlar qataryn bıyl jas kásipkerler bastamasymen júzege asyrylǵan qurǵaq qurylys materıaldary, kondıterlik ónimder, kúrishten daıyndalatyn tátti taıaqshalar tolyqtyrdy.
Osy on aıda ShOB sýbektileriniń sany 56 867-ge jetip, byltyrǵy osy kezeńmen salystyrǵanda 5,3 paıyzǵa ósti. Mamandar dereginshe, óńirde ár toqsan saıyn isin jańa bastaǵan 800 kásipker qatarǵa qosylyp otyr. О́tken jyldyń on aıynda aımaqta shaǵyn jáne orta bıznes 144,5 mlrd teńgeniń ónimin shyǵarsa, bıyl bul kórsetkish 173,3 mlrd teńgege jetti.
Mamandar saýda salasynda quny 718 mln teńge bolatyn 13 ınvestısııalyq joba iske asyrylyp, 214 jumys orny qurylǵanyn atap ótti.
– Budan bólek, elektrondy saýda salasynda ósim baıqalady. Jalpy, shaǵyn jáne orta bıznes kórsetkishin ulǵaıta túsý úshin keler jyly 2 myńnan astam jobaǵa jeńildetilgen nesıe, 1500 jobaǵa memlekettik granttar berý josparlanýda, – dedi basqarma basshysy.
Qyzylorda oblysy