Elbasy Nursultan Nazarbaev Nur Otan partııasy Saıası keńesiniń keńeıtilgen otyrysynda jańa dəýirdegi qazaqstandyqtarǵa baǵdar bolatyn «Eldiktiń jeti tuǵyry» atty qaǵıdattar jıyntyǵyn usyndy. Elbasy Təýelsizdiktiń otyz jyldyǵyn aıtýly jetistikteri retinde qýatty elge aınalyp, birligi bekem qoǵam qurǵanymyzdy, syndarly saıasat júrgizip, əleýeti zor naryqtyq ekonomıkalyq júıe qalyptastyrǵanymyzdy, əlem kartasynda egemen elimizdiń oıyp turyp oryn alǵanyn aıta kelip, «eń bastysy, babalarymyz ǵasyrlar boıy ańsap ótken Təýelsizdikke qol jetkizip, eldigimiz qaıta jańǵyrdy», dedi.
Ataýly otyz jylda dúnıege kelgen 9,5 mıllıonnan astam urpaǵymyzdy «kózi ashyq, kókiregi oıaý, sanasy azat, oıy ozyq jańa býyn» deı kele, Nursultan Nazarbaev olarǵa «Memlekettilikti saqtap, Qazaqstandy «Məńgilik El» etý osy urpaqqa júkteletin tarıhı mıssııa» dep amanat etti. Otyz jyldyq belesti elmen birge ótkergen Elbasy óziniń jas urpaq qa joldaǵan úndeýinde «Eldiktiń jeti tuǵyry» retinde kelesi mindetterdi aıtty: «Təýelsizdik – kez kelgen azamat úshin eń qasterli qundylyq», «Birlik pen kelisim – eldigimizdiń myzǵymas tuǵyry», «Jer – ata-baba murasy, halyq qazynasy», «Otbasy men salt-dəstúr – qoǵamnyń altyn dińgegi», «Ulttyq mədenıet – halyqtyń rýhanı tiregi», «Bilim men eńbek – baqýatty ómirdiń kilti», «Pragmatızm – bəsekege qabiletti bolýdyń kepili».
Qaǵıdattar jıyntyǵy týraly tarqatyp aıtar bolsaq, tamyry tereń tarıhymyzǵa qurmetpen qarap, memlekettiligimizdi qadirleý, ony kózdiń qarashyǵyndaı qorǵaý – ərbir qazaqstandyqtyń mindeti. Al Təýelsizdikti nyǵaıtý – ekonomıkany nyǵaıtý. Sondyqtan jas urpaq el ıgiligi úshin ərdaıym eńbek etýge daıyn bolýy qajet.
Ekinshiden, «etnıkalyq əralýandyq – birtutas ult retinde qalyptasqan halqymyzdyń artyqshylyǵy. Bir shańyraqtyń astynda tatý-tətti ǵumyr keship, tatýlyq pen syılastyqty qamtamasyz etýde Qazaqstan halqy Assambleıasynyń əleýeti zor». Bul rette «Konstıtýsııany qasterleý, memlekettik tildi bilý, ulttyq qundylyqtardy qadirleý – ər azamattyń paryzy» ekendigine Elbasynyń, Memleket basshysy Q.K.Toqaevtyń joldaýlary men alqaly jıyndarda sóılegen sózderinde basa nazar aýdarylyp keledi. Sondyqtan birligimizdi arttyryp, yntymaǵymyzdy kúsheıtsek qana eldigimiz nyǵaıyp, egemendigimiz baıandy bolady.
Úshinshiden, elimiz ben ulan-baıtaq jerimiz – halqymyz úshin tutas uǵym. Təýelsizdik jyldarynda shekaramyzdy qujat júzinde bekitýge orasan zor kúsh jumsaldy. Sondyqtan «ata-baba amanatyna adal bolyp, ulan-ǵaıyr jerimizdi qorǵaý, ony bolashaq urpaqqa mıras etý – bizdiń ortaq boryshymyz».
Ata dəstúrimizde otbasy qundylyǵyn ardaq tutatyn elmiz, ıaǵnı «otbasy men salt-dəstúr – qoǵamnyń altyn dińgegi, otbasy – urpaq tərbıesiniń ustahanasy, qoǵamdyq qatynastardyń bastaýy sanalatyn biregeı ınstıtýt». Elbasynyń jas urpaqqa aıtar kelesi qaǵıdaty – sanaly urpaq tərbıeleý úshin eldik bolmystyń ózegin saqtaı bilý.
Elbasy N.Nazarbaev «Bolashaqqa baǵdar: rýhanı jańǵyrý» jəne «Uly dalanyń jeti qyry» týraly baǵdarlamalyq maqalalarynda rýhanııat məselelerin tereńnen tolǵaǵan bolatyn. Uly dala mədenıetin mıras etken rýhanı-mədenı muralarǵa baı halyq retinde ulttyq bolmysymyzdy saqtap qalý – jahandaný dəýirindegi basty mindetterdiń biri. Sol sebepti Eldiktiń kelesi tuǵyry – ulttyq minez, asqaq rýhpen mədenıetimizdi zerdelep, ózge jurtqa nasıhattaı bilý.
Altynshydan, «О́zińe sen, ózińdi alyp shyǵar, eńbegiń men aqylyń eki jaqtap» dep dana Abaı aıtqandaı, qazirgi júzjyldyq – bilimdiler zamany. Sondyqtan elimizde talantty əri daryndy, alǵyr da ójet jastar Elbasynyń jalpyǵa ortaq eńbek qoǵamyn qurý týraly ıdeıasyndaǵy evolıýsııalyq damý, ortaq jaýapkershilik, ózara seriktestik, yntalandyrý men kəsi bılikke umtylýdan turatyn bes prınsıpke súıene otyryp alǵa basýy kerek. Sebebi tabystyń kilti – úzdiksiz bilim alý men tynymsyz eńbek etýde.
Təýelsiz elimizdiń basty strategııalyq maqsaty aıqyn – əlemdegi eń damyǵan jetekshi otyz eldiń qataryna ený. Bul úshin «qolda bar resýrs pen múmkindikti paıdalanýǵa, nətıjeli jumys atqarýǵa jəne kózdegen maqsatqa tıimdi qol jetkizý ge tyrysýymyz kerek». Bul rette Ult lıderi «pragmatızm prınsıpteri boıynsha barynsha qanaǵatshyl, únemshil, ustamdy bolyp, ýaqytty oryndy paıda la nýǵa talpynǵan jón», dep atap kórsetti.
Elbasy usynǵan Eldiktiń jeti tuǵyryna súıene otyryp, biz Təýelsizdigimizdi baıandy etip, el tutastyǵyn saqtap, otbasylyq qundylyqtardy jańǵyrtyp, ult mədenıetin nasıhattap, tereń bilim men adal eńbekke den qoıǵan jasampaz el bolamyz!
Ustazdar əýletinen shyqqan, shırek ǵasyr dan astam bilim berý salasyn da eńbek etip kele jatqan ustaz əri kópbalaly ana, jastarmen jumys jasap júrgen qoǵam belsendisi retinde aıtarym, jas urpaqqa jəne balalarymyzǵa artylyp otyrǵan osynaý uly mindet – tərbıe taǵylymyna aınalary sózsiz. «Arystandaı aıbatty, jolbarystaı qaıratty, qyrandaı kúshti qanatty» (M.Jumabaev) jalyndy jastarymyzdyń rýhy asqaq, oıy ozyq, bilimi joǵary bolýy úshin olardy qoldaý maqsatyndaǵy syndarly saıasat negizinde memlekettik baǵdarlamalar qabyldanyp, júzege asyrylyp jatyr.
Ulyq merekemiz – el Təýelsizdiginiń otyz jyldyǵy qarsańynda aıtylǵan Elbasynyń ataly sózi – jasampaz elimizdiń bolashaǵy jastardyń adastyrmas temirqazyǵy, jol silter baǵdarshamy!
Mıra BALTYMOVA,
Aqtóbe qalalyq məslıhatynyń depýtaty,
«Q.Jubanov atyndaǵy Aqtóbe óńirlik ýnıversıteti» KeAQ bas ǵylymı hatshysy,
fılologııa ǵylymdarynyń kandıdaty, qaýymdastyrylǵan professor