Elbasynyń «Táýelsizdik taǵylymy» atty maqalasyn oqyp bolǵannan keıin taǵy bir ret Kóshbasshymyzdyń adam jáne saıasatker retindegi biregeı qabileti, danalyǵy men kóregendiligine tań qaldym.
Bıyl el Táýelsizdigine – 30 jyl. Bul merzim adam ómirimen eseptegende de, tarıhı turǵydan alyp qaraǵanda da kóp ýaqyt emes. Biraq osy bir qysqa merzimniń ishinde ekonomıkalyq-áleýmettik jáne saıası qıynshylyqtardy eńsere bilgen Qazaq eli álem moıyndaǵan memleketter qataryna qosyldy. Alaıda Táýelsizdiktiń alǵashqy jyldary halyqaralyq sarapshylar jáne saıasattanýshylar Qazaqstan etnostyq jáne dinı qaqtyǵystar saldarynan ydyrap ketýi múmkin degen boljamdar aıtatyn. Biraq bul pessımıstik boljamdar júzege asqan joq.
Kópetnosty Qazaqstan úshin turaqtylyqty, etnosaralyq kelisimdi qamtamasyz etý – memlekettik saıasattyń mańyzdy basymdyqtarynyń biri, áleýmettik-ekonomıkalyq jáne saıası reformalardy júrgizýdiń negizgi mindeti boldy. Elimizdiń Tuńǵysh Prezıdenti – Elbasy Nursultan Nazarbaevtyń saıası erik-jigeri, kóregendigi halyqtyń birligin qamtamasyz etýge baǵyttaldy. Bul saıasattyń ómirde iske asyrylýy qoǵamdyq kelisim men jalpyulttyq birliktiń qazaqstandyq modelinde kórinis taýyp, ol halyqaralyq turǵydan moıyndaldy.
Elimizdiń basty zańy – Konstıtýsııamyzda etnosaralyq jáne konfessııaaralyq qatynastar týraly normasy «biz, Qazaqstan halqy» degen sózderden bastalady, bul áýel bastan-aq eldiń barlyq azamattarynyń ortaqtyǵy ıdeıasyn bildirý úshin jazylǵan. Biz birgemiz, birtutaspyz jáne úlken ult nemese kishi ult dep bólinbeımiz. Táýelsizdigimizdiń alǵashqy kúnderinen bastap Elbasy elimizdegi birlik pen tatýlyq ıdeıasyn júzege asyrý prınsıpin árqashan alǵa qoıǵan bolatyn.
Elbasy: «Azat elimizdiń jastary Táýelsizdikke barar joldyń qandaı azapty bolǵanyn, qandaı qurbandyqtar men synaqtar – 1916 jylǵy ult-azattyq kóterilis, azamat soǵysy, asharshylyqtyń alapat eki tolqyny, qýǵyn-súrgin men repressııalar, Uly Otan soǵysy, tyń ıgerý jyldaryndaǵy jappaı qonys aýdarýdyń zardaby arqyly jetkenimizdi bilýi kerek. Munyń ózi ótken tarıhty qasterlep, odan sabaq alý úshin qajet. Meniń «Táýelsizdik – babalar qanymen kelgen kıeli qundylyq» deıtinim osydan», dep aıtady.
El táýelsizdiginiń basynda turǵan, ótpeli kezeńniń barlyq qıynshylyǵyn eńserip, memleketimizdi saıası, áleýmettik, ekonomıkalyq daǵdarystarǵa soqtyrmaı, búgingi kóz kórgen yntymaq pen jetistikke qol jetkizgen elimizdiń Tuńǵysh Prezıdenti Nursultan Nazarbaevtyń qajyrly eńbegin, durys tańdaǵan saıasatyn álem jurtshylyǵy da moıyndaýda. Qazir Táýelsiz Qazaq eliniń tarıhy jasaldy.
Elimizdiń Táýelsizdigi men Elbasy eńbeginiń bir-birimen tyǵyz ushtasyp jatqanyn, olardyń bir-birimen ajyraǵysyz egiz uǵym ekenin aqıqat esebinde tarıh kórsetip otyr.
Oıymdy qoryta kele, Elbasynyń: «Elińniń uly bolsań, elińe janyń ashysa, azamattyq namysyń bolsa, qazaqtyń ulttyq jalǵyz memleketiniń nyǵaıyp, kórkeıýi jolynda jan terińdi syǵyp júrip eńbek et. Jerdiń de, eldiń de ıesi óziń ekenińdi umytpa!» degen sózi bolashaq urpaqqa uran bolsyn dep tileımin!
Qasıetti Táýelsizdigimiz baıandy bolsyn!
Natalıa DEMENTEVA,
Májilis depýtaty