Bile bilgen kisige, táýelsizdik aıtýǵa ońaı bolǵanmen, júrekke salmaq salar qasıetti uǵym. At aryr, ton tozar, qadir keter, biraq táýelsizdik máńgige qalýǵa tıis bolat dińgek. Osy bir zor dińgekti tuǵyryna ornatýda oǵylandyq tanytqan Elbasynyń eren erligi tańǵalarlyq. Tańǵalarlyǵy – táýelsizdiktiń týyn qan tókpeı tikti. Azattyqtyń aq tańy mamyrajaı raýandandy. Tizesi barlar búgildi, basy barlar júgindi. Shaǵystyrǵandardyń da, shabystyrǵandardyń da úni óshti. Qazaq ultynyń táýelsizdigi boı kóterdi.
Maqalanyń eń bir tartymdylyǵy – ótkenge barlaý jasaǵany. Ǵasyrlar qoınaýynan bastaý alǵan azattyq jolyndaǵy kúrestiń sońǵy 30 jyly baısaldy, derek-dáıekpen saralanǵan. Súısinesiń, sebebi kóz kórip, júrek sendi, qulaq estip, kóńil sendi.
«Táýelsizdik te baqyt sııaqty, baǵalaǵan adamnyń, aıalaǵan qoǵamnyń qolyna turaqtaıdy» deıdi Elbasy. Maǵynasy zor sóz. О́ıtkeni keıde aramyzda táýelsizdigimizdiń baıybyna barmaı, qısynsyz baıbalamǵa salatyn zarjaqtar tabylyp qalatyny jasyryn emes. Qoǵamdaǵy kez kelgen qaıshylyqtardyń astaryna shı júgirtip, búırekten sıraq shyǵarýǵa áýestenetinder bar. Olar úshin eldiń berekesi men birligi tym jeńil dúnıe sekildi. Qazaq mundaıda «Bilgenge – toǵyz, bilmegenge – toqsan toǵyz» nemese «Bilimsizdiń bilmegenin keshirmeseń, bilgeniń qaısy» ne bolmasa «Qadirińdi bilmegenge, qadirińdi ketirme» deıdi. Eńsesi bıik elimizdiń bosaǵasy da myǵym. Myǵym bolatyny – jampozy men oǵylany kóp alash balasy bar.
Eger baıyppen oqysa, Elbasynyń bul maqalasy Táýelsizdiktiń shynaıy taǵylymyn uǵyndyryp beredi. Tom-tom kitaptyń syǵyndysy ispetti, eldiń úsh on jyldyǵynyń syrly shejiresi bolyp shyqqan. Bul – bir. Ekinshiden, búgingi el jaǵdaıy, azat urpaqtyń bolmys-bitimine baǵa berilgen. «Táýelsiz elimizdiń basty baılyǵy – adam» degen Elbasy, sondaı-aq: «Eń bastysy – elimiz aman, urpaǵymyz azat. Biz alaqanǵa salyp ósirgen sol azat urpaq endigi jerde «Men Qazaqstanyma ne beremin?» degendi oılaýy kerek».Tuńǵysh Prezıdentimizdiń osy sózi kez-kelgen el perzentin oılantyp qana qoımaı, menińshe tolǵantý kerek.
Tolǵantatyny, qazirgideı tehnogendik zamanda otanymyzdyń ekonomıkalyq qýatyn arttyrý bir mindet bolsa, alash jurtynyń rýhanııatyn júdetpeı, baıytý zor mindet. Osy rýhanı salanyń ókili bolǵandyqtan biz Elbasynyń týǵan til, dil, salt-dástúr týraly aıtqandaryn júrekpen qabyldaımyz. Áıtse de, tilimiz kemeline kelip, órisin keń jaıa qoıǵan joq. Mundaıda taǵy da Elbasymyz osy maqalada: «Keıde oılaımyn: qazaq degen ne degen tózimdi halyq?! Kónbeske kónip, shydamasqa shydaǵan. Bolashaǵy buldyr bolǵan kúnniń ózinde saǵyn syndyrmaı, keleshekten úmitin úzbegen. Qıyndyq ataýlyǵa qasqaıa qarsy turyp, úzdiksiz alǵa jyljyǵan». Alǵa jyljı da beremiz. Sebebi Táýelsizdik dińgegin myqtap, tuǵyryn shegendeı túsetin órshil halyqpyz. Maqalany tushyna oqyǵan kisige osyndaı jiger beredi.
Januzaq AIаZBEKOV,
oblystyq «Qostanaı tańy» gazetiniń dırektor –
Bas redaktory, Halyqaralyq «Alash» syılyǵynyń laýreaty