Qostanaı oblysyndaǵy joǵary jáne orta oqý oryndarynda ótken patrıottyq aksııada stýdent-jastar Prezıdent Nursultan Nazarbaevtyń Máńgilik El ıdeıasyn qoldaıtyndyqtaryn bildirdi. Sondaı aksııanyń biri M.Dýlatov atyndaǵy Qostanaı ınjenerlik-ekonomıkalyq ýnıversıteti men osy attas kolledjde ótti. Bilim ordasynyń úlken akt zaly stýdentter men oqytýshylarǵa lyq toldy. Qazaq eliniń keń dalasyn, týǵan jerge degen mahabbatty pash etken patrıottyq ánder jandy erekshe baýraıdy. Bul aksııada áp degennen Máńgilik El ıdeıasy búginniń ǵana emes, bolashaqtyń jarqyn kórinisi ekeni aıtyldy. Jer úshin ómiri attyń jalynda ótken atalarymyzdyń táýelsiz el bolý armany oryndaldy.
– El bolý ońaı emes, al sol eldi saqtap turý odan da qıyn. Mine, ýaqyt onyń aınalamyzdaǵy zardapty mysaldaryn aldymyzǵa tosyp otyr. Eldi ustap turý úshin onyń ekonomıkasyn damytýymyz, oǵan úles qosýymyz, árqaısymyz týǵan jerdiń, eldiń patrıoty bolýymyz qajet. Sol úshin stýdent-jastardyń mindeti sapaly bilim alý, oqý, erteńgi bilikti maman bolyp shyǵý, – dedi ýnıversıtet rektory, ekonomıka ǵylymdarynyń doktory Sábıt Esmuratov. Munan keıin bilim ordasynyń basshysy Nursultan Nazarbaevtyń kemeńger saıasatynyń durystyǵyna toqtaldy.
– 1997 jyly men Nursultan Nazarbaevtyń alǵashqy Joldaýyn tyńdaýǵa qatysqan edim. Sonda Elbasy aıtqan máseleler múmkin emesteı, tańǵalyp qaıtqan bolatynmyn. Mine, qazir sonyń barlyǵy da júzege asty. Qazaqtyń dalasynda elordamyz toty qustaı taranyp ósti. Nursultan Ábishuly eldiń bolashaǵy tek qana halyqtyń, qazaqstandyqtardyń birliginde ekenin ár kezdesýinde aıtyp otyrady. Muny da ómir rastap otyr, – dedi Sábıt Borısuly.
Aýǵanstan jerindegi soǵystyń ardageri, zapastaǵy podpolkovnık Anatolıı Harchenko jastardyń patrıottyq aksııasynyń qonaǵy boldy.
– Qazaqstan táýelsizdigin alǵan jyldarǵy qıyndyqtardy búgingi jastar úlkenderdiń aıtýynan ǵana biledi. Al bizder ony óz basymyzdan ótkizdik. Astana qalasy salynady degende kópshilik adamdardyń oǵan kúmáni bolǵany ras. Men de «Zeınetaqy tólenbeı jatqanda tutas qala qalaı boı kótermek?» dep oılaǵanmyn. Kóp ýaqyt ótpeı-aq men bizdiń Qazaqstannyń qýatty el ekenine kózim jetti. Alysty boljaıtyn saıasatker Nursultan Nazarbaevtyń ár bastamasyn jan-tánimmen qoldap otyramyn. Eldiń bolashaǵy, ony qorǵaý, táýelsizdiktiń irgesin bekite túsý – bizdiń óz qolymyzda. Nursultan Nazarbaev ulttar men ulystar arasyndaǵy dostyqty, yntymaqtyń bolýyn aıtýmen keledi. Men Qazaqstanda týdym. Áskerden keıin qaıda ketsem de erkim edi. Biraq men týǵan jerime qaıtyp oraldym. Bul jerde meniń atamnyń, ájemniń kindik qany tamǵan. Bul – meniń Otanym. Men durys tańdaý jasaǵanmyn. Qazaqstan úshin barymdy beremin. О́ıtkeni, munda meniń balalarym ósip keledi, Qazaqstan – solardyń, myna sizderdiń bolashaǵyńyz! «Qazaqstan-2050» Strategııasyn myna sizder júzege asyrasyzdar, ıgiligin de sizder kóresizder!– dep Anatolıı Harchenko tebirene sóıledi. Patrıottyq shara stýdentter shyrqaǵan ánmen, bımen órnektelip otyrdy.
Munan keıin sóz alǵan oqytýshylar, kásipkerler, stýdentter Elbasynyń Qazaqstan halqyna bıyl joldaǵan «Qazaqstan joly – 2050: bir maqsat, bir múdde, bir bolashaq» Joldaýyndaǵy «Máńgilik El» ıdeıasyn qoldaıtyndyqtaryn aıtty. Olar bul ár stýdent elimizdiń patrıoty bolǵanda ǵana múmkin dedi. Aksııa sońynda oǵan qatysýshylardyń barlyǵy qosylyp Qazaqstannyń Ánuranyn shyrqady.
Názıra JÁRIMBETOVA,
«Egemen Qazaqstan».
QOSTANAI.