Temir joný Maıra Amanovanyń súıikti kásibine aınaldy

Ádette temir-tersektiń aına­lasyndaǵy kásipterdi er-aza­mat­tar ǵana meńgeredi degen túsi­nik bar. Alaıda, ji­gitterge ǵana tán kásip qazaq qyzdarynyń qoly­nan kelmeıdi dep kim aıta alar. Buǵan naqty dálel re­tinde Maı­ra Amanovanyń temir jonýshy mamandyǵyn meńgergeni dálel. Názik jan­dy zamandasy­myz «Jyly­oı­munaıgaz» basqar­ma­syna qarasty óndiristik qural­dardy jóndeý jáne paıdalaný sehynda 25 jyldan beri abyroıly eńbek etip keledi. – Mektepte oqyp júrgeni­mizde bizdi óndiristik-oqý kombınatyna aparýshy edi, – dep eske alady Maıra ózi tańdaǵan mamandyqqa qy­zyǵýshylyǵyna sheginis jasap. – Sonda stanok janynda tur­ǵan aǵalarymyzdyń qolynan shıyr­shyqtalyp jerge túsip jatatyn temir jańqalaryna tańdana qaraýshy edik. Biraq keleshekte dál osy temir joný meniń de súıik­ti kásibime aınalady dep oı­la­map­pyn. Kenetten ákem ómir­den ótip, joǵary oqý or­nyna barýǵa múmkindik bola qoı­ma­dy. Bizdi ómirge ákelgen aıaýly anaǵa qaraılasý úshin mektepke ju­mysqa ornalastym. Keıin Aty­raý qa­lasyndaǵy kásiptik-tehnı­kalyq ýchılısheden temir jonýshy mamandyǵyn meńgerip shyqtym... Bir qyzyǵy, Maıradan buryn osy kásipti inisi Berik meńgerip alypty. Bul da Maıranyń temir jonýshy bolýyna yqpal etken sekildi. Qazir ekeýi de bir sehta jumys jasaıdy. Maıramen birge osy sehta temir jonýshylyqty meńgergen jáne bir qurbysy bar. Ol – Aıgúl Ermaǵanbetova. «Aıgúl bul sehqa menen úsh jyl buryn kelgen» dep Maıra jumystas qurbysy týraly áńgimelegendi unatatynyn baıqatyp qaldy. Aıgúl qurbysy jáne ózge de áriptesterimen birge kún saıyn erteletip temirden túıin túıý úshin sehqa asyǵady. Bastapqyda ásirese, názik jandylarǵa bul kásipti ıgerý ońaı tımegeni ras. Sehta uzaq jyl jumys jasaǵan aldyńǵy tolqynnan kóp úırendi. Qazir ózgeler sekildi Maıranyń da tájirıbesi jetildi. – Bul – tez mashyqtana qoıa­tyndaı kásip emes, – deıdi temir jonýshy Maıra Amanova. – Áldebir temirdiń burandasyn shyǵarý óte dáldikti, sonymen birge, jaýapkershilikti qajet etedi. Jonatyn tustan sál qıys ketip, bolmashy ǵana qatelik ji­ber­seń, sonyń ózi jasaǵan jumy­syńdy joqqa shyǵaratyny árdaıym este turýy kerek. Onyń ústine ujymnyń abyroıyn túsir­megen jón. Sol sebepten, kún saı­ynǵy jumysymda qatelikke uryn­baýǵa, eń bastysy, ózim eńbek etetin ujymymnyń abyroıyn asqaqtatý oıymda turady. О́z isin únemi jaýapkershilik­pen atqaratyn Maıra Amanova ujymdaǵy eń abyroıly temir jonýshynyń biri. Stanok janynda tapjylmaı turyp, kúnine birneshe burandalar men bilikterdi joný sekildi tapsyrystardy sapaly oryndaýǵa daǵdylanǵan. Onyń názik bolsa da altynǵa bergisiz saýsaqtarymen jasalǵan tapsyrystar sapasyna esh syn aıtylǵan emes. Syn aıtylmaq túgili kúmán da keltirilmeıdi. О́ıtkeni, Maıra Amanova óz isiniń sheberi atandy. – Bastapqyda meniń bul temir jonýshy bolǵanyma tańǵala qaraǵandar kóp edi. Tipti, bul seniń kásibiń emes, sen názik jandysyń ǵoı. Mundaı jumysty er-azamattar atqarýy kerek, dep meni raıymnan qaıtarǵysy keletinder tabyldy, – deıdi ol tershigen mańdaıyn suq saýsaǵynyń syrtymen súrtip jiberip. – Biraq, árkim óziniń júregi qalaǵan isimen aınalysýy qajettigin uǵyndym. Kóńilim osy kásipke buryldy da turdy. Stanoktyń dybysynan maǵan qanat bitkendeı bolady. Shúkir, ózim qalaǵan kásipten úlken abyroıǵa bólenip júrmin. Eńbegimniń jemisin de kórip kelemin. Maıranyń stanokta temir jonyp turǵan sátine kýá bol­ǵa­nymyz bar. Bir kezderi óziniń bala kóńilinde jattalyp qal­ǵandaı, zyryldaǵan stanok­ta temir bilikterdi jonyp turǵan onyń janyndaǵy jáshikte shıyr­shyqtalǵan temir jańqalary túı­d­ek­telip jatyr. Kózdiń jaýyn alardaı ádemi dúnıelerdi álsin-álsin ólsheıdi. Áp-sátte bir-birinen aýmaı qalǵan temir bilikterdi Maıranyń názik saýsaq­tarymen jasaldy degenge sen­giń kelmeıdi. О́zimiz kýá bol­ǵan soń, temir jonýshy Maıra Amano­vanyń da óz isiniń has sheberi atana bastaǵanyna eriksiz ılandyq. Ol – tek sheber temir jonýshy ǵana emes, ózi eńbek etetin ujymnyń namysyn sporttyq saıystarda abyroıly qorǵap júrgen sheber voleıbolshy. «Besinshi synyptan beri sporttyń osy túrine qyzyqtym. Voleıboldy áli oınap kelemin» deıdi sportty janyna serik etken zamandasymyz. Jeke daýysta ándi keremet shyrqaıdy. Maıra jeke daýysta án shyrqaǵanda, ony ózi­men jumystas Aıgúl men ózge sehtaǵy qos qurbysy gıtara­men qostap turady. Sonymen bir­ge, ómirlik serigi Sırajan Muham­bedınov ekeýi tórt bala tárbıelep otyrǵan úlgili otbasynyń ıeleri. Balalarynyń úlkeni – Jalǵas Atyraýdaǵy Munaı jáne gaz ınstıtýtyn bitirgen joǵary bilimdi maman eken. Alaıda, uly­nyń jeke kompanııada atqarǵan jumysynan qysqaryp qalyp, jumyssyz júrgeni janyna ba­tatynyn ashyp aıtpasa da, ańǵa­rylyp turǵanyn jasyrǵymyz kelmedi. Adal eńbegimen abyroıǵa bólenip júrgen Maıra da ana ǵoı, al ananyń bári balalarynyń joǵary bilim alǵanyn, jumysqa ornalasqanyn qalamaıdy deısiz be?!. Joldasbek ShО́PEǴUL, «Egemen Qazaqstan». Atyraý oblysy, Jylyoı aýdany.