Elimizde ýaqyt aǵymymen qalyptasqan jaqsy bir dástúr bar. Ol jyr alyby Jambyldyń týǵan kúnin jyl saıyn atap ótý. Bıyl da Jetisý jerinde bul úrdis óz máresinen kórindi. Saltanatty jıynda dúıim jurttyń aldyna shyqqan Almaty oblysynyń ákimi Ańsar Musahanov: «Jambyl meniń óz atym, Halyq meniń shyn atym» dep artyna óshpes iz, ólmes mura qaldyrǵan babanyń jaýhar jyrlary ýaqyt ótken saıyn saf altyndaı jarqyraı túsýde», dep atap kórsetti.
Elbasy Nursultan Nazarbaev «Uly jyrshy Jambyl – qazaqtyń dástúrli ádebıetiniń asa daryndy, asqaq jaratylǵan alyp ókili» degen edi. Jambyldyń eshkimge des bermegen sýyryp salma aqyndyǵymen qosa, jyraýlyǵy, kúıshiligi, qazaq halqyn kúlli álemge tanytqan ústine tanyta túskeni aqıqat. Sóıtip, talaılardy tamsantyp qana qoımaı bas ıdirip, Jambyl HH ǵasyrdyń Gomeri atanýy tegin emes. Bir ǵasyr ǵumyr keship, urpaǵyna ólsheýsiz mura qaldyrǵan jyr alyby keıingi tolqynnyń qyzyǵýshylyǵyn týǵyzyp hám qazaq tiliniń qaınaryna qandyryp, sóz qudiretin uǵyndyrýda. Sonymen qatar, aıtys óneri arqyly jastardyń asqaq adamgershilik sezimi shyńdalyp, elge, jerge, týǵan tilge degen súıispenshiligi artýda. Búgingideı ár ult óziniń tabıǵı bolmysyn saqtaý arqyly órkenıet órine umtylyp jatqan tusta, jas óskinderdi Jambyl jyrlary arqyly ulttyq qundylyqty qasterleýge beıimdeý bizdiń azamattyq boryshymyz dep esepteımin. Jyl saıyn dástúrli túrde Jambyl kúni merekesin ótkizý «jambyltaný atty úlken arnanyń bastalǵanyn, onyń máńgilik taqyryp ekenin ańǵartady. Jambyl toıy – qazaq mádenıetiniń, qazaq óneriniń toıy, ortaq qazynamyz dedi. Ákim odan keıin Jambyldyń shóberesi Álimqul Jambylovtyń ıyǵyna qundyz jaǵaly shekpen jaýyp, basyna bórik kıgizdi. Muny azamattyń bilgendigi, asyldyń synyǵyn baǵalaǵandyǵy, dep uqty jıylǵan qaýym. Saltanat sońy óńir ónerpazdarynyń áýelete salǵan ásem ánderi men kúmbirlete tókken kúıine ulasty.
Nurbol ÁLDIBAEV,
«Egemen Qazaqstan».
Jambyl aýdany,
Almaty oblysy.