Halyqaralyq áıelder kúni meıramy qarsańynda qala ákimdiginiń qoldaýymen jáne «Qalalyq jumyspen qamtý jáne áleýmettik baǵdarlamalar» MM bastamasymen uıymdastyrylǵan «Aq bata» aksııasy aıasynda qala ákiminiń orynbasary Aıgúl Arynǵazıeva men qalalyq jumyspen qamtý jáne áleýmettik baǵdarlamalar bóliminiń basshysy Náıla Bórtebaeva, oblystyq jasóspirimder úıiniń tárbıelenýshileri jasy júzden asqan jáne Uly Otan soǵysyna qatysqan keıýanalardy quttyqtap bardy.
Uzaq jasaýdyń syry
Olar birinshi bolyp 105 jastaǵy Jupar Sataevany quttyqtady. Kezinde ákesi qýǵyn-súrginniń qurbany bolǵan Jupar áje jastaıynan jetimdiktiń taqsyretin tartyp ósedi. Es bilip, etek japqannan keıin ujymshardyń, keńshardyń qara jumysyna jegiledi. Baqytyna qaraı Sársenbi atty adal jar tap bolyp, baqyttty otbasyn qurady. Jupar áje ekeýi on bala tárbıelep ósiredi. Qazir olardyń árqaısysy óz aldyna bólek shańyraq kótergen, turmys qurǵan.
Qarııasy ómirden ozǵan. Jupar áje kenje balasy Búrkittiń qolynda turady. О́zi áli baqýatty, júris-turysy shıraq. Sál qulaǵy báseńdeý estıdi demeseń, qýnaq, sózi túzý. Kókiregi kemel keıýanany ǵasyrdan astam jas jasady dep áste de oılamaısyń. Shaly sonaý keńestik kezeńniń ózinde bes ýaqyt namazyn qaza qylmaǵan taqýa adam bolypty. Áje de bes ýaqyt namazǵa jyǵylyp, oraza ustap, musylmanshylyqtyń barlyq sharttaryn ustanady eken. Nemereleri Arystan men Ahmet ájesiniń qolyna sý quıyp, keregin taýyp beredi. Jupar áje 90 jasynda arab tilin oqyp, úırenipti. Qazir Qurandy túpnusqadan oqı beredi. О́zi Mekkege qajylyq saparǵa baryp qaıtypty. Dindar keıýana balalaryna da din jolyn ustanýǵa, adal bolýǵa, taza júrýge jol siltep otyrady. Qala ákiminiń orynbasary Aıgúl Arynǵazıeva Jupar ájeni halyqaralyq áıelder kúnimen quttyqtap, aqshalaı syılyq tapsyrdy, oblystyq jasóspirimder úıiniń tárbıelenýshi qyzdary gúl shoqtaryn usyndy.
Jupar áje óz kezeginde ótken ómir jolyn eske alyp, urpaqtaryna bata berdi.
Uzaq jasaýyńyzdyń syry nede degen saýalǵa «Júrek taza, kóńil aq bolýy kerek, eshkimge jamandyq oılamaý qajet. Sondaı-aq, eńbekten qashpaý kerek. Barǵa aspaıtyn, joqqa saspaıtyn qanaǵat kerek», dep jaýap berdi keıýana.
Marshal Rokossovskııdi kórgen
Sodan keıin qala ákiminiń orynbasary bastaǵan azamattar Uly Otan soǵysynyń ardageri Zorıa Abılhanovany 8 naýryz – Halyqaralyq áıelder kúnimen quttyqtady. Qan maıdanda baılanysshy bolǵan keıýana da tyń. Ol óziniń 2-shi Belarýs maıdanynyń shtabynda baılanysshy bolypty. Bir ret qana maıdan qolbasshysy Marshal K.Rokossovskııdi kórgenin jetkizdi. On segiz medalmen marapattalǵan Zorıa Ǵabdolqyzyna soǵysta alǵan «Erligi úshin», «Kenıgsbergti alǵany úshin» jáne «Germanııany jeńgeni úshin» medaldary aıryqsha ystyq. Soǵysty Berlınge 80 shaqyrym jerde aıaqtaǵanyn da maqtanysh sezimmen eske aldy. Soǵystan keıin telegrafshy bolyp eńbek etken, tyń ıgerýge qatysyp, «Qobda» keńsharynda on jyl hatshy-mashınıstka bolǵan. Ul men qyz ósirip, tárbıelegen keıýanaǵa qazir qyzy Valentına Vasılevna men kelini kezek qarasady. Ana Uly Otan soǵysyna qatysýshylarǵa birqatar jeńildikter jasaǵan, dárigerlik kómek jáne áleýmettik qoldaý kórsetip otyrǵan jergilikti bılikke rızashylyǵyn bildirdi.
– Biz «Aq bata» aksııasyna qatysyp, qart analarymyzdyń alǵysyna bólenip júrmiz. Bul kisilerge qadirli qarttyq, densaýlyq tileımin, – dedi Aqtóbe jasóspirimder úıiniń tárbıelenýshisi Gúldana Quttymuratova. «Aq bata» aksııasy aıasynda qaladaǵy júz jastan asqan 12 keıýana jáne soǵysqa qatysqan 23 áje de merekelik quttyqtaýǵa ıe boldy. Sondaı-aq, qazirdiń ózinde oblystyń ekonomıkalyq damýyna úles qosqan, kóp balalaly analardy memlekettik jáne jeke mekemeler quttyqtap, syı-sııapattaryn jasaýda.
Satybaldy SÁÝIRBAI,
«Egemen Qazaqstan».
Aqtóbe oblysy.