Qamqorlyqqa kenelip edi

Ákemiz de, anamyz da kelisti adamdar edi. Ákemiz surapyl soǵysty bastan ótkergen maıdanger bolatyn. Anamyz ju­mys talǵamady. Qoı­dy da, eshkini de qyrqyp, túıeni de kúzeıtin. Mal­dyń terisin óńdedi. Jún­di túrli boıaýmen boıap, alasha toqýǵa jip ıiretin, ult­tyq oıý-ór­nek­ter sa­lynǵan teke­met basatyn. Soǵys jyl­darynda saýyn­shy bolyp ju­mys istegen. Áli esimde, bizdiń baqshalyq jerimiz bar bolatyn. Anamyz kóktem shyǵysymen sol jerdi únemi baptap, qaýyn men qarbyzdy molynan egetin. Jaz boıy dastarqanymyzdan qaýyn men qarbyz, ózge de baqsha daqyldary men kókónis túrleri, qaımaq pen maı, irimshik pen súzbe, aıran sekildi tabıǵı qunarly ta­ǵamdar bir úzilmeıtin. 1986 jyly ata-anamyz Almaty qa­lasyna kóshti. Zına jeńgemizben birge ınstıtýttan soń Almatyda tu­raqtap qalǵan. Aǵamyzdyń otbasynda Myrzada men Madına esimdi eki kishkentaı ósip jatqan. Ata-anamyz ulyna bir taban jaqyndaǵandy jón kórip, eńbek demalysyna kelgen apa-jezdemiz Darııa men Ǵabdrashıdpen birge Al­ma­tyǵa jol tartty. Ol kezde Almatyda pá­ter alý qıyn edi. Qa­la­ǵa tir­kelý de ońaı soq­paıtyn. Ákemiz Uly Otan so­ǵysynyń múge­de­gi, anamyz 11 qur­saq kó­terip, 9 balany tárbıelep, ósir­­gen «Ardaqty Ana» edi. Ana­myz sol kezde­gi Mı­nıstrler Keńesi­niń Tóra­­ǵasy Nursultan Nazar­baevqa hat jazyp, kómek su­rap­ty. Nursultan Ábishuly ana­myz­­dy arnaıy qabyldap, «Esh ýaıymdamańyz, bári de durys bolady» depti. Arada biraz ýaqyt ótkende ata-anamyzǵa jańa páterdiń orderin ákelip beripti. Anam: «Úlkendi syılaıtyn, aldyna barǵan adamdy tyńdaı biletin parasatty jan eken», degendi udaıy aıtyp otyratyn. Baspana alýyna kómekteskeni úshin alǵysyn bil­di­rýge qabyl­daýyna barǵanda ana­myz bolashaq Prezıdentke: «Eliń­niń bolashaǵy úshin atqarar qyz­metiń jemisti bolsyn, aınalaıyn!» dep aq batasyn beripti. Keıin 1998 jyly Prezıdent saılaýy kezinde Nur­sultan Ábishulynyń kandıdatýrasyn qoldap, jeńiske jetýin tilep otyrdy. Prezıdent saı­laýynan soń arnaıy quttyqtaý jedelhatyn jiberdi. Anamyz sekil­di aqpeıildi jandardyń tilegi qabyl bolǵan shyǵar, Nursultan Nazarbaev Táý­­el­siz elimizdi álemge tanytyp keledi. Sol páterinde «Zınger» máshı­ne­simen kózdiń jaýyn alardaı ásem buıymdar tigýin jalǵastyrdy. Ár kún saıyn kóılek, ulttyq na­qysh­tarmen kómkerilgen qamzol, ózge de zattar tigetin edi. Onyń uzyn sany 365-ti qurady. Bul kúnderi ákemiz de, anamyz da ómirden ótti. Eger tiri bolsa, bıyl ákemiz 104 jasqa, anamyz 100 jasqa tolar edi. Alaıda, olar bul jas­qa jete alǵan joq. Ákemiz ben ana­myz­dyń aıaly alaqanynyń jylýyn áli de saǵynamyz. Biz úshin qıyndyq­qa tózip, bar meıirimin tógip, «Aı­nalaıyn, aman júr» degen bir aýyz jyly sózi júrek túkpirinde jat­ta­lyp qaldy. Búginde áke-sheshemizdiń ul-qyzdarynan 24 nemere, 48 shó­bere órbidi. Mine, sol urpaǵy ómirdi jalǵastyryp jatyr. Beıbit KО́ZBOL-SABYROVA. Atyraý oblysy.