Sársenbi ońtústik astananyń talaı turǵyny úshin sátimen bastalǵan tamasha kún boldy. Osy kúnge deıin kezekte turǵan 100 turǵyn jańa páter kiltterin alyp, qonys toıyna da jetti. Qalalyqtardyń qýanyshyna Almaty qalasynyń ákimi Ahmetjan Esimov ortaqtasyp, Halyqaralyq áıelder kúni qarsańynda úı kezeginde turǵan jandarǵa tıisti qujattar men páter kiltterin ózi tapsyrdy.
Osylaısha, samaladaı óz oshaqtarynyń tabaldyryǵyn attaǵan jańa qonys ıeleriniń 80-i áıelder boldy. Olardyń ishinde kópbalaly analar, múgedekter, jetim balalar, áleýmettik sala qyzmetkerleri, mádenıet, bilim, densaýlyq salasynyń qyzmetkerleri bar.
Turǵyndary kún saıyn kóbeıetin megapolıs qalanyń ákimi Ahmetjan Esimov munan bylaıǵy ýaqytta da memleket tarapynan almatylyqtardy turǵyn úımen qamtamasyz etýge kóńil bóletindigin jetkizdi.
Eger ótken jyly 420 otbasy kommýnaldyq úı alsa, bıyl olardyń sany 650-di quraıdy eken. Qalalyq ıpotekalyq baǵdarlama boıynsha 440 otbasy páter alsa, bıyl olardyń sany 550-ge artpaq. Qoljetimdi baspana boıynsha bıyl 378 otbasy páter alady, ótken jyly alǵandary – 216 otbasy.
Kezdesý sońynda qala ákimi áıelderdi aldaǵy 8 naýryz merekesimen quttyqtady, ár otbasyǵa baıandy baqyt tiledi.
«Egemen-aqparat».
ALMATY.