Palata Tóraǵasy Nurlan Nyǵmatýlınniń tóraǵalyǵymen ótken Májilis bıýrosynda jalpy otyrysta qaralatyn máseleler belgilendi, dep habarlady osy palatanyń baspasóz qyzmeti.
Palata talqylaýyna birinshi oqylymǵa keıbir zańnamalyq aktilerge menshik quqyǵyn qorǵaýdy kúsheıtý, sharttyq mindettemelerdi qorǵaýdy kepildendirý jáne olardy buzǵany úshin jaýapkershilikti qatańdatý máseleleri shyǵarylady.
Jalpy otyrystyń kún tártibiniń jobasyna ratıfıkasııalaýǵa qatysty: 1994 jylǵy 28 naýryzdaǵy Qazaqstan men Reseı Úkimetteri arasyndaǵy Kelisimge avarııalyq-qutqarý qyzmetteri memlekettik shekarany kesip ótýiniń ońaılatylǵan tártibi týraly Hattama jáne Qazaqstan-Qyrǵyzstan tótenshe jaǵdaılar men tabıǵat apattarynyń táýekelin tómendetý boıynsha Ortalyq qurý týraly kelisim bar.
Palataǵa eki zań jobasy boıynsha qorytyndy ázirleý usynyldy. Olar – Eýrazııalyq ekonomıkalyq qoǵamdastyqqa múshe memleketterdiń eksporttyq baqylaýynyń biryńǵaı tártibi týraly kelisimniń kúshin joıý týraly jáne 1928 jylǵy 22 qarashadaǵy Halyqaralyq kórmeler týraly konvensııany, oǵan 1948 jylǵy 10 mamyrdaǵy, 1966 jylǵy 16 qarashadaǵy, 1972 jylǵy 30 qarashadaǵy hattamalardy jáne 1982 jylǵy 24 maýsym men 1988 jylǵy 31 mamyrdaǵy túzetýlerdi ratıfıkasııalaý týraly zań jobalary.