Jurt arasynda jyly lebizge laıyqty adamnyń biri – Gúlnur Sádýaqasova. Ol 1991 jyly pedagogıkalyq ınstıtýtty bitirip birden Zavod orta mektebi dırektorynyń tárbıe isi jónindegi orynbasary qyzmetine qabyldanǵanda-aq kóp nazaryn ózine aýdarǵan. Bul el tarıhyndaǵy betburysty ári qıyn-qystaý kezeń ekendigi belgili. Osyndaıda jalyndy jastardyń jarqyrap alǵa shyǵatyny ǵanıbet. Stepnogor qalasy ózindik erekshelikteri, tipti, bólekshe ustanymdary bar shaHar desek bolǵandaı. Sol ustanymdardyń, ashyǵyraq aıtsaq, Máskeýge tikeleı baǵynyp kelgen jasyryn qala mentalıtetiniń seń-tońdary da ońaılyqpen buzyla qoımaǵany jasyryn emes. Ásirese, jasóspirimderdiń boıyna táýelsiz Qazaq eliniń asyl murattaryn sińirý mańyzdy memlekettik sharýa edi. El adyndaǵy paryz ben qaryzdyń pátýasyn túsingen Gúlnur qatarly jastar sanany silkintý sharýasynda jan aıamaı, shattanyp ta, shyrqyrap ta jumys istegeni kóz aldymyzda. Mekteptiń aty shyǵa bastady, qurmetpen aýyzǵa ilinetin boldy. Buryndary nashar atymen tanymal Zavodskoıdyń tirshilik aýany túzelip, úlgi alarlyq qyrlary kóbeıe bastady. Mektep túlekteriniń bári túgel demeı-aq qoıalyq, basym kópshiligi joǵary jáne orta oqý oryndaryna túskeni de jyr etip aıtýǵa jararlyq edi. Qazirgi kúni jergilikti turǵyndardyń qolynan kelmeıdi degen kenshilik, shahterlik, qurylysshylyq, ınjenerlik mamandyqty urshyqtaı úıirgen azamattar qatary qalyńdaı túsken. Dúnıeniń tutqasy tárbıede desek, Gúlnur Ánýarbekqyzynyń 14 jyldyq ǵumyry Stepnogor qalalyq bilim bóliminde ótkeni zańdy qubylys sııaqty. Sonyń teń jartysynda basshy qyzmetin atqardy. Stepnogordyń bilim men zııatkerlik baǵyttaǵy silkinisteri kóp tirlikke qozǵaý salǵany «jaqsynyń jaqsylyǵyn aıt» degen naqyldy únemi eske túsiredi. Oblysta mektepter men balalar baqshasyn bárinen kóp salǵan da osy qala. Bul ıgi ister Gúlnur Sádýaqasovanyń qala ákiminiń orynbasary laýazymyn atqarǵan 2007-2013 jyldary erekshe ekpinmen damydy. Oblystaǵy birden-bir monoqala dárejesindegi shaHar barlyq qyrynan shyraılanyp tur. Shyraılana beretinine de shák keltire almaısyz. Muny Gúlnur juldyzynyń jarqyraǵan tustary desek bolǵandaı. Qandaı da mádenı-kópshilik, saıası, ekonomıkalyq turǵydaǵy sharalar osynda ótkizilip, jınaqtalǵan jaqsy tájirıbeler Qazaq eli kógin aralap ketkeni qashan. Bir qaraǵanda, qalanyń qyzy Gúlnur Sádýaqasovanyń byltyr Shortandy aýdany ákiminiń saılaýyna úmitker bolyp qatysqanyna tańǵalǵandaı kúı keshkenimiz ras. Únemi kúlimsirep, jylylyq tógip júretin názik jannyń qaırat qaınarlarynyń aýqymy keńı bastaǵanyn túsindik. Astanaǵa jaqyn aýdan aýyrlaý edi, esesine úsh úmitker myqty kórindi. Gúlnur jeńip shyqty. Ákim atandy. Jaı ǵana emes, Aqmola oblysynyń tarıhyndaǵy tuńǵysh áıel ákim atandy. Jylǵa tolmaıtyn ýaqytta birshama jumys tyndyryldy. Ony tizbelep jatý mindet emes degenniń ózinde, búgingi ýaqyt ár nárseniń baǵasyn talap etetini bar. Qazirgi kúni meılinshe tereń baǵa esepti kezdesýlerde beriledi. Biz bıylǵy aqpan aıynda sol jınalysqa qatysyp edik. Aýdandaǵy 50-den astam ulttyń ókili ortaq tirshiliktiń uıytqysy bola bilgenine «bárekeldi» deýimiz kerek. Aýyl sharýashylyǵynda 10,7 mıllıard teńgeniń jalpy ónimi óndirilgen. Kórsetkishtiń eselenýine salaǵa quıylǵan memlekettik 365 mıllıon teńge qarjynyń áseri mol. Osynyń arqasynda bir jyldyń ishinde 1 mıllıard teńgeniń 38 jańa kombaıny men 4 dán sebý keshenin satyp alýǵa múmkindik týǵan. Barlyq túlik boıynsha mal basynyń ósýi 2,3 mıllıard teńgeniń ónimin óndirýge jol ashqan. Munda Elbasynyń Astananyń azyq-túlik beldeýin qalyptastyrý jónindegi tapsyrmasy aıryqsha nazarda ustalady. Shortandylyqtar 3400 tonna et, 12600 tonna sút daıyndasa, sonyń deni Elorda dastarqanynyń sánin ashqany ákimniń baıandamasynda qanaǵatpen atap ótildi. Aýdannyń barlyq saladaǵy kórsetkishteri oblys deńgeıinde aýyzǵa ilinip júrgeni ras. О́zimiz press-týrlarǵa qatysý barysynda ony ashyp kórsetýge tyrystyq. Bizdi aýdan ákiminiń eshqashan asyp-taspaıtyny, aldaǵy mindetterdiń qatparlaryn salmaqtaı biletini, eń bastysy, adamdarmen til tabysa biletini, jigerlendirip júretini tánti etedi. Kóp senimine ıe jannyń kópsalaly jumysynyń úıirilip turatyny osydan bolsa kerek. Bul aýdanda eki aýyldyq okrýgtiń ákimdik tizginin áıel azamatshalar ustap otyr. Aýdan basshysy bizben qoshtasarda solardyń esimderimen qatar, aýyl sharýashylyǵy men ónerkásip salasyndaǵy ozattardy, áleýmettik saladaǵy áriptesterin, elge janashyr «bıznes ledılerdi», ardaqty analardy, qadirli apa-sińlilerin bas gazetimiz arqyly quttyqtaýymyzdy ótindi. Biz de mereke mereıli bolsynymyzdy aıtamyz.
Baqbergen AMALBEK,
«Egemen Qazaqstan».
Aqmola oblysy,
Shortandy aýdany.
Sýrette: aýdan ákimi Gúlnur Sádýaqasova.