Shýaqty kóktem Kókshetaýǵa shattyǵyn ala keldi. Qala ákimi Jarqyn Jumaǵulov Muhtar Áýezov kóshesindegi eki birdeı 108 páterli turǵyn úıdiń kiltterin qýanysh ıelerine tabys etti.
«Qoljetimdi turǵyn úı-2020» baǵdarlamasymen boı kótergen kóp qabatty ǵımarattar qurylysyna qazyna qorjynynan 926 mıllıon teńge bólinip, ony bas merdigerler «Stroıqurylys-2030» jáne «StroıTehServıs Kókshetaý» jaýapkershiligi shekteýli seriktestikteri tolyq ıgerdi. Jaıly páterler negizinen soǵys jáne eńbek ardagerlerine, áleýmettik turǵyda nashar qorǵalǵan jandarǵa, jas otbasylarǵa, balalar úıiniń túlekterine berildi. Bul sanattaǵy kisilerdiń sany 74 adamdy qurap otyr.
Sondaı-aq, halyqaralyq áıelder merekesi qarsańynda, «Birlik» shaǵyn aýdanynda ata-analar men oqýshylar asyǵa kútken jańa mektep kesheni esigin aıqara ashty. Oqý-tárbıe kesheninde 216 oryndyq mektep pen 80 oryndyq balalar baqshasy qatar ornalasyp otyr. Munda qazaq tili, matematıka, bıologııa, hımııa, fızıka, ınformatıka, aǵylshyn tili kabınetteri tıisti jabdyqtarymen jarqyrap tur. Zamanaýı sport zaly men ashana da ásemdigimen kóz tartady.
Qýanyshty sharaǵa jınalǵandar zaman talabyndaǵy qurylystyń tıimdiligin atap kórsetip, ony sapaly atqarǵan «Mármár» JShS ujymyna alǵystaryn bildirdi.
Baqbergen AMALBEK,
«Egemen Qazaqstan».
KО́KShETAÝ.
–––––––––––––––
Sýretterdi túsirgen
Ermurat DOSYMOV.