Malaızııalyq eń iri áýe kompanııasynyń birine qarasty Boeing 777 áýe laıneri Kýala-Lýmpýr qalasynan Beıjińge bet alyp ushyp shyqqannan keıin eki saǵattan soń, belgisiz jaǵdaıda joǵalyp ketken.
Ushaq bortynda 12 ekıpaj múshesi jáne álemniń 14 elinen 227 jolaýshy bolǵan kórinedi. Aldyn ala málimetter boıynsha, olardyń 154-i Qytaı azamattary bolyp tabylady. Sonymen birge, ushaqta Malaızııanyń – 38, Úndistannyń – 5, Indonezııanyń – 7, Avstralııanyń – 7, AQSh-tyń – 4, Fransııanyń 3 azamaty, Jańa Zelandııa, Kanada jáne Ýkraınanyń – 2-den, sonymen birge, Reseı men Nıderlandydan bir-birden azamattar bolǵan.
Joǵalyp ketken Boeing 777 ushaǵyn izdeý operasııasyna Malaızııanyń, Qytaıdyń, Sıngapýrdyń, Vetnamnyń, Fılıppınniń jáne Indonezııanyń avıasııalary men kemeleri qatysýda. AQSh Ońtústik Qytaı teńizine eki esmınes jáne izdeý-qutqarý jumystaryna arnalǵan jabdyqtary bar «Orıon» áskerı ushaǵyn jiberdi. Izdeý jumystaryna jalpy sany 40 keme men 22 ushaq qatysýda.
Aldyn ala júrgizilgen tekserýler joǵalyp ketken áýe laıneriniń bortynda bóten bireýlerdiń qujattaryn paıdalanyp, ushaqqa otyrǵan eki jolaýshynyń bolǵanyn anyqtap otyr. Malaızııa azamattyq avıasııa departamentiniń basshysy Azharýddın Abdýl Rahmannyń baspasóz máslıhatynda habarlaǵanyndaı, urlanǵan pasporttar boıynsha ushaqqa otyrǵan eki jolaýshy qara násildiler bolǵanymen, afrıkalyqtar emes kórinedi. Tergeý anyqtaǵandaı, olardyń ekeýi de bıletti Irannan jasalǵan bron boıynsha kýrortty Pattaıa qalasynda satyp alǵan eken. Sonymen birge, koroldik polısııasynyń basshysy Halıd Abý Bakar bógde tólqujatpen ushaqqa otyrǵan eki adamnyń biriniń kim ekendiginiń belgili bolǵandyǵyn da aıǵaqtap otyr. Biraq, polısııa basshysy onyń malaızııalyq emes ekenin ǵana jetkizip, kúdiktiniń naqty ultyn aıtýdan bas tartqan.
Qazirgi ýaqytta izdeý operasııasyna qatysýshylar laıner dıspetchermen baılanysty joǵaltqannan keıin Kýala-Lýmpýr áýejaıyna qaıta oraldy degen nusqany qarastyrýda. Anyqtalmaǵan sońǵy málimetterge qaraǵanda, Ońtústik Qytaı teńiziniń Vetnam jaǵalaýynda joǵalyp ketken ushaq bólshekterine uqsas synyqtar tabylǵan.