Qańtardaǵy qaıǵyly oqıǵa kezinde zardap shekken jeke jáne zańdy tulǵalardy qoldaý sharalary jalǵasyp jatyr. Elimizdiń barlyq aımaǵynda Tótenshe jaǵdaı rejiminiń engizilýine baılanysty kásipkerler de, qarapaıym azamattar da jumystaryn biraz kidirtýge májbúr boldy. Nátıjesinde, eńbek ónimdiligi men tabys tómendep ketti. Az ýaqyttaǵy shyǵynnyń úlken perspektıvada ózindik mańyzy bar ekeni aıtpasa da túsinikti.
Azamattarǵa jáne bıznes sýbektilerine qoldaý kórsetý maqsatynda Qarjy naryǵyn retteý jáne damytý agenttiginiń jeke jáne zańdy tulǵalardyń qaryzdary boıynsha tólemderdi keıinge qaldyrý tártibin qabyldaǵany belgili. Tártip aıasynda tótenshe jaǵdaıdy engizý nátıjesinde zardap shekken azamattarǵa jáne bıznes sýbektilerine, onyń ishinde dara kásipkerlerge berilgen, bankterdiń jáne mıkroqarjy uıymdary kredıtteriniń barlyq túri boıynsha tólemdi 3 aıǵa keıinge qaldyrý múmkindigi usynylady. Bul múmkindikti paıdalaný úshin qaryz alýshy nesıe uıymyna 2022 jyldyń 4 sáýirine deıin arnaıy ótinish berdi.
«О́tinish berilgen kúnge qaramastan, kredıt boıynsha tólemderdi keıinge qaldyrý múmkindigi 2022 jylǵy 5 qańtar – 5 sáýir aralyǵynda kúshinde bolady. Qaryz alýshynyń jáne kredıttik uıymnyń ózara kelisimi boıynsha aqy tóleýdi keıinge qaldyrýdyń ózge merzimi belgilenýi múmkin. Kredıttik uıym tótenshe jaǵdaı kezeńinde qaryz alýshynyń qarjylyq jaǵdaıynyń nasharlaýy nemese keltirilgen zııan týraly aqparat bolǵan kezde qaryz alýshynyń kredıti boıynsha tólemderdi keıinge qaldyrý múmkindigin beredi» dep habarlaıdy agenttik.
Qaryz alýshynyń tańdaýyna qaryz boıynsha keıinge qaldyrylǵan tólemderdi óteýdiń 3 balama kestesi beriledi:
1) qaryz merziminiń sońyna deıin keıinge qaldyrylǵan tólemderdi tepe-teń bólý;
2) tólem merzimin keıinge qaldyrý kezeńine qaryz merzimin ulǵaıtý túrinde;
3) qaryz/mıkrokredıt shartynda nemese qaryz alýshynyń ótinishinde kórsetilgen óteýdiń ózge tásili.
О́tinish elektrondy poshtanyń, «bank-klıent» onlaın-júıesiniń, ınternet-resýrstyń, mobıldi qosymshanyń, basqa baılanys quraldarynyń kómegimen ne qaryz alýshynyń kredıttik uıym keńsesine barýy arqyly erkin nysanda berilýi múmkin. Qaryz alýshynyń ótinishin kredıttik uıym 10 jumys kúni ishinde qaraıdy.
«Kredıt boıynsha tólemderdi keıinge qaldyrý múmkindigi avtomatty túrde, shartqa qosymsha kelisimderge qol qoımastan beriledi. Tótenshe jaǵdaı jáne kredıt boıynsha tólemderdi keıinge qaldyrý qoldanysta bolǵan kezeńde kredıttik uıymǵa: qaryz (mıkrokredıt) sharttary boıynsha aıypaqy (aıyppuldar, ósimpuldar) esepteýge jáne talap etýge; eseptelgen jáne merzimi ótken syıaqyny, aıypaqyny (aıyppuldy, ósimpuldy) negizgi borysh somasyna qosýyna tyıym salynady. Tólem merzimin keıinge qaldyrý kezeńinde kredıttik uıymdar qaryz alýshy boıynsha shaǵym-talap jumysyn júrgizbeıdi jáne merzimi ótken bereshekti óteý qajettiligi týraly habarlamaıdy», dep aqparat berdi agenttik.
Sonymen qatar qaryz alýshy nesıe tólemin keıinge shegergen jaǵdaıda, bul áreket onyń nesıe tarıhyna jaǵymsyz tańba bolyp túspeýge tıis.