Aqtaýdaǵy Nazarbaev Zııatkerlik mektebiniń 12-synyp oqýshysy Beıbarys Orynbasar Germanııadaǵy Djeıkobs ýnıversıtetinde (Jacobs University) tegin oqýǵa shaqyrtý aldy.
Ýnıversıtet mundaı bilim grantyn oqýshynyń bilim salasyndaǵy jetistikteri men erekshe daǵdylary úshin bergen. Beıbarys atalǵan joǵary oqý ornynda elektr jáne kompıýter ınjenerııasy salasy boıynsha mamandana alady.
– Beıbarysqa bul ýnıversıtette aǵylshyn tilinde bilim alý múmkindigi berildi. Tek nemis tilinde beriletin bilim granttarynyń qasynda bul úlken jetistik dep sanaımyz. Bolashaǵynan úmit kúttiretin zııatkerdiń kórsetkishteri óte joǵary. Máselen, aǵylshyn tiliniń halyqaralyq emtıhany IELTS-qa ózdiginen daıyndalyp, 7,5 ball jınady, – deıdi mekteptegi kásibı baǵdar jónindegi keńesshi Ásel Ismahanbetova.
Beıbarys Orynbasar – Aqtaýdaǵy zııatkerlik mekteptegi úzdik oqýshylardyń biri. Birneshe halyqaralyq pán olımpıadalarynyń júldegeri. Sonymen qatar jeńil atletıkadan da úzdik nátıjeler kórsetip keledi.
– Ýnıversıtetke qujat tapsyrý úshin eń aldymen halyqaralyq deńgeıde qajetti emtıhandardy tapsyryp, joǵary ball jınaýǵa jumystandym. Bul turǵyda ustazdarymnyń kómegi sheksiz. Sondaı-aq ýnıversıtette oqýǵa laıyqty stýdent ekenińdi dáleldeıtin motıvasııalyq hat, esselerdi aǵylshyn tilinde jazyp tapsyrdym. Meniń oıymsha, grant taǵaıyndaý máselesinde buǵan deıingi olımpıada men jarystardaǵy jetistikterim sheshýshi ról oınady dep oılaımyn, – deıdi Beıbarys.
Zııatker áli de joǵary oqý oryndarynda baǵyn synap kórmek. Sol úshin de qyzý daıyndyq ústinde.
Mańǵystaý oblysy