Úkimettiń keńeıtilgen otyrysynda Mańǵystaý oblysynyń ákimi Nurlan Noǵaev oblystaǵy kásiporyndardyń jumysshylarynyń narazylyǵy týraly aıtty, dep habarlaıdy Egemen.kz.
Memleket basshysy Qasym-Jomart Toqaev Mańǵystaý oblysyndaǵy ahýal ońaı emesin aıtty.
– Meniń tapsyrmama sáıkes, óńirdi keshendi damytýǵa qatysty jospar qabyldandy. Bul qujat bıyl taǵy da pysyqtaldy. Oǵan sáıkes qomaqty qarajat bólindi. Ol birinshi kezektegi mindetterdi sheshýge jumsalady. Sondyqtan isti sozbaı, dereý jumysqa kirisý kerek, – dedi Qasym-Jomart Toqaev.
Prezıdent qabyldanǵan sharalarǵa qaramastan eńbek ujymdarynyń narazylyǵy kúsheıip kele jatqanyn jetkizdi.
– Jumysshylardyń barlyq talabyn muqııat qaraý kerek. Olardyń zańdy quqyqtary men múddeleri saqtalýy kerek. Kásipodaq jetekshileri men jumysshylary sherýge shyǵyp jatqan kompanııa ıelerine syndarly dıalog ornatý qajet. Qabyldanǵan sheshimderdiń barlyǵyn qarapaıym jumysshydarǵa durys túsindirý kerek. Problemamen aınalysýdy ákimdikke júktep qoıýǵa bolmaıdy. Olardy qoldap, týyndaǵan máselelerdi birlese qaraǵan jón. Problemalardy sheshý úshin Úkimet men «Samuryq-qazyna» birlese jumys isteýi kerek. Qajet bolsa, Úkimettiń arnaıy komıssııasyn Mańǵystaý oblysyna jiberý kerek, – dedi Memleket basshysy.