Muqaǵalıdyń týǵan kúni Almatydaǵy Maqataev pen Jeltoqsan kóshesiniń qıylysyndaǵy aqyn eskertkishiniń aldyna jınalǵan jastar alma-kezek jyr oqydy, dep habarlaıdy Egemen.kz.
Bul – buljymas dástúrge aınalǵaly qashan. Bir ǵajaby, muny eshkim arnaıy uıymdastyryp jatpaıdy. Jyrsúıer júrekterdi aqynǵa degen asqaq qurmet, mahabbat jetelep ákeledi munda. Qolaısyz aýa raıyna qaramastan bıyl da aqyn eskertkishine jınalǵandar az bolǵan joq. Poezııa padıshasynyń esimin áspettegender rýhyna taǵzym etip, eskertkishine gúl shoqtaryn qoıdy. Jınalǵandar arasynan mektep oqýshylarynan bastap qaz-qaz basqan qarııalardy da kezdestirdik. Tebirene óleń oqyp, aqyn kúndelikterinen syr shertken Muqaǵalı Maqataev atyndaǵy mektep-gımnazııanyń shákirtteri de osy jerden tabyldy.
Eskertkish aldynda bir shoq gúl ustaǵan otyzdar shamasyndaǵy zamandasymyzdy áńgimege tarttym. Qala irgesinde turatyn Elnazar Ahmetbektiń: «Muqaǵalıdyń týǵan kúni men úshin saǵyna kútetin mereke sekildi» degeni kóńilimizdi terbep ótti. Júk kóligin júrgizetin qarapaıym azamat, mamandyǵy múlde basqa bolsa da óleń súıetinin, ásirese, Muqaǵalı jyryn jastana oqıtynyn jetkizdi.
– Jyl saıyn aqpannyń toǵyzy kúni basqa jumystardy ysyryp, Muqaǵalı eskertkishine kelemin. Jastardyń óleń oqyǵanyn tamashalaımyn. Múmkindigim kelse Keńsaıdaǵy aqyn zıratyna baryp, Quran baǵyshtaýdy da ózime paryz sanaımyn. Bara almaı qalǵan kezderimde, ózimdi qolaısyz sezinip, aqyn aldynda uıatty bolǵandaı boıymdy bir qyzyq sezim bıleıdi, – deıdi Elnazar Ahmetbek.
Eskertkish jumys keńsemizge jaqyn ornalasqandyqtan, kelýshiler legi qas qaraıǵansha úzilmeıtinin baıqaımyz. Toǵyzynshy aqpanda munda kelgen úlken-kishini mıllıondardyń jyr qubylasyna aınalǵan poezııa qudireti qaýyshtyrady. Jáne osylardyń ishinde Elnazar keshken sezimdi bastan ótkeretinder az emes ekenin anyq sezgendeı bolamyz. Kenet, aqynnyń «men máńgi ólmeıtin shyǵarmyn» degen joldary eriksiz esimizge túsedi.