Prezıdenttiń tóraǵalyq etýimen ótken Úkimettiń keńeıtilgen otyrysynda Memleket basshysy Úkimettiń áleýmettik-ekonomıkalyq damýy týraly esepterin tyńdady. 2022 jylǵa arnalǵan is-qımyl jospary ortaǵa salyndy.
Prezıdent osy jıynda jerdi utymdy paıdalaný, kólik qurastyrý, Úkimettiń memlekettik baǵdarlamalary týraly óz oılaryn ortaǵa saldy. Aýdan ákimderine jumys oryndaryn kóptep ashý týraly tapsyrma berdi.
Sondaı-aq atom elektr stansasy, ýtılızasııalyq alym, bankterdi saýyqtyrý, shaǵyn jáne orta bıznesti damytý, eldegi jalaqy máselesi, ınflıasııany retteý jóninde de naqty usynystardy aıtyp, osy máselelerdi shuǵyl sheshýge pármen berdi. Kedeıshilik pen shetten tys baıyǵandar jóninde de óz kózqarasyn bildirdi. «Samuryq-Qazyna», «Atameken» ulttyq kásipkerler palatasy jáne Ulttyq qor jóninde naqty talaptar qoıdy. Osynyń bári eldegi eń ómirsheń ári ózekti máselelerdiń Memleket basshysy nazarynda ekenin, baqylaýda ustap otyrǵanyn kórsetedi.
Qańtar oqıǵasynan keıin ekonomıkamyzdy tezirek saýyqtyrý jónindegi naqty sharalardy belgilep bergeni kóńilge qýanysh uıalatty. Sondyqtan endi Úkimettiń budan arǵy jumysy barynsha ashyq jáne shıraq, tıimdi bolýy kerek dep esepteımin.
Nurtóre JÚSIP,
Senat depýtaty