Ystanbulda Túrki memleketteri uıymy Aqsaqaldar keńesiniń 12-shi otyrysy ótip jatyr. Kezdesý Túrkitildes memleketterdiń yntymaqtastyq keńesiniń (Qazirgi Túrki memleketteri uıymy – M.B.) Syrtqy ister mınıstrleri keńesinde qabyldanǵan Aqsaqaldar keńesiniń jańa erejelerine sáıkes alǵash ret ótkizilip otyr. Keńestiń jańartylǵan qurammen ótkizip jatqan úsh kúndik otyrysyna Qazaqstan Respýblıkasynyń jańadan taǵaıyndalǵan ókili Ikram Adyrbekov te qatysyp jatyr.
Túrki memleketteri uıymy janyndaǵy Aqsaqaldar keńesiniń jumysy birneshe jyldan keıin qaıta jandana bastady. Oǵan 2021 jyly qarashada Ystanbulda ótken Túrki memleketteri basshylary qabyldaǵan tarıhı sheshimder jańa serpin berdi. Sammıt jumysy barysynda «Túrki áleminiń keleshegi – 2040» strategııalyq qujaty qabyldandy. Túrkitildes memleketterdiń yntymaqtastyq keńesi jańa dárejege ıe bolyp, Túrki memleketteri uıymy retinde qaıta bekitildi. Bul uıymǵa múshe elderdiń yntymaqtastyǵyn damytý men nyǵaıtý jolyndaǵy mańyzdy qadam boldy. Bıylǵy 9 aqpan kúni Ystanbulda jumysyn bastaǵan Aqsaqaldar keńesiniń otyrysynda memleketter basshylary qabyldaǵan sheshimderdiń ózektiligi men oryndalýy, iske asyrý tetikteri jan-jaqty talqylandy.
Alǵashqy bolyp sóz alǵan Aqsaqaldar keńesiniń tóraǵasy Bınalı Iyldyrym Keńes múshelerine túrkitildes memleketter basshylarynyń tarapynan zor senimmen qatar úlken jaýapkershilik júktelgenin aıta kele, áriptesterine Túrki memleketteri uıymynyń jarqyn bolashaǵy jolyndaǵy qyzmetterine, árbir isterine sáttilik tiledi. Sonymen qatar ol óz sózinde Qazaqstanda qańtar aıynda bolǵan qaıǵyly oqıǵaǵa baılanysty shynaıy kóńil bildire otyryp, Prezıdent Q.Toqaevtyń eldiń táýelsizdigin, tutastyǵyn, tynyshtyǵyn saqtaýǵa, terrorıster, ekstremıster men qylmyskerlerdi buǵattaýǵa, tosqaýyl qoıýǵa baǵyttalǵan batyl da naqty sheshimderin qoldaıtynyn jetkizdi.
Alqaly jıynda sóz alǵan Qazaqstannyń Túrki memleketteri uıymy janyndaǵy Aqsaqaldar keńesindegi ókili Ikram Adyrbekov qańtar aıynda elde bolǵan jaǵdaıdan áriptesterin qysqasha habardar ete kelip, Aqsaqaldar keńesiniń baýyrlas Qazaqstandaǵy qaıǵyly oqıǵaǵa qatysty bildirgen kóńili men tilekterine alǵys aıtty. Ol sondaı-aq Túrki memleketteri uıymynyń qazirgi tóraǵasy Túrkııanyń 11 qańtarda Syrtqy ister mınıstrleri keńesiniń tótenshe otyrysyn ótkizýi der kezinde kórsetilgen qoldaý bolǵanyn atap ótti.
Qatysýshylar Túrki memleketteri uıymynyń 2022-2026 jyldarǵa arnalǵan strategııalyq josparyna usynystaryn Keńes otyrysynda talqylady. Mysaly, Túrki memleketteri uıymy jumysynyń tıimdiligin arttyrý úshin «Turaqty ókilder» ınstıtýtyn engizý, Uıym hatshylyǵynyń baǵyt-baǵdaryn, bilim, mádenıet pen ortaq tarıhı jobalaryn qoldaýǵa aýdarý sekildi ózge de usynystar aıtyldy.
Qazaqstan ókili byltyr qarashada Ystanbulda ótken sammıttiń sheshimine sáıkes qurylatyn Túrki ınvestısııalyq qorynyń shtab-páterin Prezıdent Q.Toqaevtyń Túrkistandaǵy beıresmı sammıtte aıtqan usynysymen «Astana» halyqaralyq qarjy ortalyǵynyń alańyna ornalastyrýdy qoldaýǵa shaqyrdy. AHQO alańy – bul halyqaralyq deńgeıdegi qarjy ınstıtýttarynyń úzdik tájirıbesin, biregeı tehnıkalyq saraptamasyn, ınfraqurylymy men qyzmet tájirıbesin biriktiretin qarjylyq ekojúıe retinde naqty negiz bola alatynyna jan-jaqty dálelder keltirdi.
I.Adyrbekov Aqsaqaldar keńesiniń múshelerin saýda men ınvestısııalar úshin qolaıly jaǵdaı jasaýǵa, taýarlardyń, kapıtaldardyń, qyzmetter men tehnologııalardyń erkin qozǵalysy úshin kedendik jáne tranzıttik rásimderdi, qarjylyq jáne bank operasııalaryn ońtaılaýǵa múmkindik beretin Qazaqstannyń taǵy bir bastamasy – Túrkistan qalasynda TURAN arnaıy ekonomıkalyq aımaǵyn qurý týraly usynysymen tanystyryp, taraptardy atalǵan jumysqa, belsendi qatysýǵa shaqyrdy.
Odan bólek Túrki memleketteri uıymyna múshe elder azamattarynyń qazirgi jáne bolashaqtaǵy yntymaqtastyqtyń negizgi baǵyttaryna qatysty oıyn bilý úshin ár sala boıynsha saraptamalyq saýaldamalar júrgizý usynyldy. I.Adyrbekov úlgi retinde Halyqaralyq Túrki akademııasy jyl saıyn júrgizetin «Túrkbarometr» áleýmettik zertteýin qarastyrýǵa bolatynyn aıtty. Qazaqstan ókili sondaı-aq Halyqaralyq Túrki akademııasynyń janynda Túrki áleminiń táýelsiz strategııalyq zertteý ortalyqtarynyń ortaq ıntellektýaldy platformasyn qurýdy jáne basqa da jobany júzege asyrý boıynsha usynystaryn bildirdi.
Qazaqstan aqsaqaly áriptesterin bıyl qyrkúıek-qazan aılarynda Túrkistanda josparlanǵan Túrkologııa quryltaıyna shaqyrdy.
Úsh kúnge josparlanǵan Keńes jumysy Ystanbulda jalǵasyp jatyr.