El bolashaǵy – balalardyń bilimdi bolyp ósýi erteńgi kúnniń berik kepili. Sońǵy ýaqytta balalardyń jan-jaqty damýyna jaqsy múmkindikter týyp otyr. Bul oraıda el Prezıdentiniń mańyzdy sózinen keıin sony serpin alǵan tárbıe oshaqtary tálimdi jumys isteýde.
El erteńin qaýzaǵan bir sózinde Memleket basshysy Qasym-Jomart Toqaev balalarǵa qatysty oıyn bylaı túıindegen bolatyn. «Balalar – memleketimizdiń jarqyn bolashaǵynyń kepili. Sondyqtan da aldaǵy jyldy «Balalar jyly» dep jarııalaý kerek dep esepteımin. Áńgime jalań uran men merekelik sharalar týraly emes. Birinshi kezekte bılik tarapynan balalardy qorǵaý úshin densaýlyq saqtaý, bilim berý, áleýmettik qoldaý baǵytynda naqty sharalar qolǵa alynýy kerek. О́skeleń urpaqtyń úılesimdi damýy men baqytty balalyq shaǵy – bizdiń jalpyulttyq mindetimiz».
Oblys ortalyǵynda 2020 jyldyń qarasha aıynda oblystyq bilim basqarmasy janyndaǵy Bolashaq Saraiy ashylǵan bolatyn. Qosymsha bilim berý ordasynyń qabyrǵasy qalanyp, ishi bilim shuǵylasymen nurlanǵaly nebári bir jyldan astam ýaqyt ótse de, tamyry tereńge tartatyn tarıhtyń alǵashqy negizi qalanyp úlgerdi. Bul oraıdaǵy maqsat belgili. Eń aldymen sanaly, bilimdi urpaq tárbıeleý. Sol arqyly elimizdiń bedelin asqaqtatatyn ulaǵatty ulttyń negizin qalyptastyrý. Bolashaq Saraiy»-ynda mektep oqýshylary men stýdentter sport, shyǵarmashylyq, IT, medıa jastar men jasóspirimderdi úılestirý baǵyttary boıynsha óz bilimderin jetildirýge tolyq múmkindik alyp otyr.
Osy bilim ordasynyń múmkindigin aıta ketelik. Bir ýaqytta 1 175 bilim alýshy ózi qalaǵan baǵyt boıynsha shuǵyldana alady. «A» blogy oqýshylardyń shyǵarmashylyqpen, ǵylymmen aınalysýyna arnalsa, «B» blogy salamatty ómir saltyn ustanyp, sporttyń áldeneshe túrimen aınalysady. Qazirgi tańda atalǵan bilim ordasynda 112 úıirme bar. Osy úıirmelerde 3 myńnan astam oqýshy bilimin arttyryp, sportpen shuǵyldanýda. Bir aıta keterligi, ár toptaǵy balalardyń sany shekteýli. Nebári 15 balaǵa deıin. Bul olardyń erkin shuǵyldanýyna múmkindik týdyrady.
Qazaqstan Respýblıkasynyń Prezıdenti Qasym-Jomarat Toqaev qazirgi ýaqytta tehnıkalyq baǵyttaǵy mamandyqtardyń artyqshylyǵyna aıryqsha mán berip otyr. О́ıtkeni, el bolashaǵy tikeleı osy baǵytqa baılanysty. Balalardyń tehnıkalyq bilim alýyna bar múmkindik qarastyrylǵan. Aıtalyq, IT baǵytynda 30 úıirme jumys isteıdi. Taldap aıtatyn bolsaq, ınjenerlik baǵyt boıynsha «Avıamodeldeý» stýdııasy, STEAM, Tesla Club, Cybertron robottehnıka sheberhanasy, radıotehnıkter klýby, New Generation energetıkter klýby, New Generation elektronshylar klýby, aqyldy zattar álemi, WeDo Club, Lego Club, Lego Mindstorms, Lego WeDo sııaqty 12 úıirme bar. Al tehnıkalyq baǵyttaǵy kishkentaılarǵa arnalǵan algorıtm, úlkenderge arnalǵan algorıtm, Python, JavaScript, IT klýb (veb negizder), «3D modeldeý» sheberhanasy, Kompıýterlik dızaın, grafıkalyq dızaın tárizdi 11 úıirme balalardyń orasan zor qyzyǵýshylyǵyn týdyrýda. Tehnıkalyq shyǵarmashylyqtyń ınnovasııalyq parkinde Wood art aǵashpen jumys, «Verf» keme jasaý, «Kreatıv» aǵash ustasy, «Kreatıv» kórkem aǵash oıý, «Babalar izimen», Stendtik modeldeý baǵytyndaǵy úıirmelerdiń jumysy úıirilip tur.
Mekemede bilim alýshylar mekemeishilik saıystar, trenıngter, kıno kórsetilim, shyǵarmashylyq keshter, ártúrli konferensııalar men forýmdar jáne taǵy basqa is-sharaǵa da qatysady. Jańa bilim ordasy ashylǵaly oqýshylar birshama jetistikke jetken. Bul sózimizge dálel retinde jas talapkerlerdiń oblystyq, respýblıkalyq, tipti halyqaralyq deńgeıdegi saıystarǵa qatysyp, júldeli oryndarǵa ıe bolyp júrgendigin aıta ketýimizge bolady. Shyǵarmashylyq baǵyttyń shyńyna shyǵýǵa umtylǵandar Reseı, Belarýs, Latvııa, Ázerbaıjan elderinde ótken ártúrli baıqaýdyń bas júldelerin alyp úlgerdi.
Sport baǵytynyń erkin kúres úıirmesiniń balýany Aldııar Baltashev Belarýs Respýblıkasynda ótken estý qabileti tómen sportshylar arasynda chempıon atandy, jas fýtbolshylar qala jáne oblys kóleminde aýla fýtbolynan toptyq 3 oryndy jeńip alsa, qazaq kúresi úıirmesine qatysatyn bir top balýan úlkendi-kishili boz kilemniń ústindegi beldesýlerden oljaly oralyp júr.
Medıa baǵytynyń tárbıelenýshileri de bilim ordasynda alǵan bilimderiniń negizinde respýblıkalyq saıystarda top jardy. Ǵylymı-ıntellektýaldy baǵyttyń oqýshysy Tamıla Jabbasova qorshaǵan ortany qorǵaý jáne tabıǵı resýrstardy tıimdi paıdalaný boıynsha Halyqaralyq ǵylymı-ekologııalyq forýmǵa qatysty.
Mekemede 114 pedagog qyzmet etedi. Olardyń arasynda óz isiniń maıtalman mamandary – ǵalymdar da bar. Bir sózben aıtqanda, Bolashaq Saraiy balalardyń bolashaǵyna keń jol ashyp kele jatqan bilim baǵyna aınalyp otyr.
Kókshetaý qalasy